అంతర్జాతీయంగా ప్రతికూల సంకేతాలు మార్కెట్లను కలవరపెడుతున్నాయి. శుక్రవారం ఆరంభ ట్రేడింగ్లో బొంబాయి స్టాక్ ఎక్స్చేంజి సూచీ సెన్సెక్స్- 300 పాయింట్లకు పైగా పతనమైంది. ప్రస్తుతం.. 130 పాయింట్ల నష్టంతో 37 వేల 180 వద్ద ట్రేడవుతోంది.
జాతీయ స్టాక్ ఎక్స్చేంజి సూచీ నిఫ్టీ 43 పాయింట్లు క్షీణించి.. 10 వేల 986 వద్ద ఉంది. ఆటో, ఐటీ, లోహ, బ్యాంకింగ్ రంగాలు భారీగా నష్టపోతున్నాయి. కొనుగోళ్లూ క్షీణించాయి.
స్టాక్మార్కెట్లు గత సెషన్(బుధవారం)లో భారీగా లాభాలను నమోదుచేయడం గమనార్హం. సెన్సెక్స్ 353, నిఫ్టీ 104 పాయింట్ల మేర మెరుగుపడ్డాయి.
ఆర్థిక వ్యవస్థ మందగమనం, అమెరికా-చైనా వాణిజ్య యుద్ధం మదుపరుల మనోభావాలను దెబ్బతీసిందని నిపుణులు అభిప్రాయపడుతున్నారు.
మోదీ-నిర్మలా భేటీ..
దేశ ప్రస్తుత ఆర్థిక వ్యవస్థపై ప్రధాని నరేంద్రమోదీ ఆర్థిక మంత్రి నిర్మలా సీతారామన్తో సమగ్ర సమీక్ష నిర్వహించారు. వృద్ధి వేగంగా మందగమనానికిలోనై.. ఉద్యోగాల కోత, సంపద ఆవిరికి కారణమవుతున్న రంగాలను గాడిలో పెట్టేందుకు అవసరమైన పరిష్కారాల గురించి సమాలోచనలు చేశారు.
లాభనష్టాల్లోనివివే....
యెస్ బ్యాంకు, ఓఎన్జీసీ, ఐటీసీ, బజాజ్ ఫైనాన్స్, కోల్ ఇండియా, ఇన్ఫోసిస్, సన్ ఫార్మాలు 1.37 శాతం మేర రాణించాయి.
హీరో మోటోకార్ప్, మారుతీ సుజుకీ, వేదాంత, హెచ్సీఎల్, భారతీ ఎయిర్టెల్, టాటా స్టీల్, టాటా మోటార్స్ డీలా పడ్డాయి. టాటా మోటార్స్ షేర్లు 2.6 శాతం మేర పడిపోయాయి.
రూపాయి...
శుక్రవారం ట్రేడింగ్లో రూపాయి స్వల్పంగా 16 పైసలు క్షీణించింది. డాలర్తో పోలిస్తే ప్రస్తుతం మారకం విలువ 71.43గా ఉంది.
