పంజాబ్ అండ్ మహారాష్ట్ర కోఆపరేటివ్ బ్యాంక్(పీఎంసీ)పై విధించిన ఆంక్షలను జూన్ 22 వరకు పెంచుతూ రిజర్వు బ్యాంక్ నిర్ణయం తీసుకుంది.
రియల్ ఎస్టేట్ డెవలపర్ సంస్థ హెచ్డీఐఎల్కు ఇచ్చిన రుణాల్లో అవకతవకలు, ఆర్థిక అక్రమాల కారణంగా పీఎంసీ బ్యాంక్పై 2019 సెప్టెంబర్ 23న ఆరు నెలల పాటు ఆంక్షలు విధించింది ఆర్బీఐ. తాజాగా మరో మూడు నెలలు పొడిగిస్తూ ప్రకటన వెలువరించింది. ఈ ఆంక్షలపై ఎప్పటికప్పుడు సమీక్ష నిర్వహిస్తున్నట్లు పేర్కొంది.
వాణిజ్య బ్యాంకుల మాదిరిగా కాకుండా కోఆపరేటివ్ బ్యాంకుల పునర్నిర్మాణానికి పథకాలు రూపొందించే అధికారం ఆర్బీఐకి లేదు. ఈ నేపథ్యంలో బ్యాంకు పునరుద్ధరణ కోసం అధికారులు, షేర్ హోల్డర్లతో సంప్రదింపులు జరుపుతున్నట్లు రిజర్వు బ్యాంకు వెల్లడించింది.
ఆంక్షల కారణంగా కొత్త డిపాజిట్లు, రుణాలు జారీ చేయకుండా పీఎంసీ బ్యాంకుపై నిషేధం కొనసాగనుంది. ఇప్పటికే బ్యాంకు బోర్డును ఆర్బీఐ రద్దు చేసింది. బ్యాంకు కార్యకలాపాలు పర్యవేక్షించడానికి మాజీ ఆర్బీఐ అధికారిని నియమించింది.
ఇదీ చదవండి: 'కరోనా ప్రభావం ముదిరితే.. కార్యకలాపాలన్నీ బంద్ చేస్తాం'