'పెట్రోల్​, డీజిల్​పై సుంకాలు 459శాతం పెరిగాయి'

ఇంధన ధరల పెరుగుదలకు కారణం అంతర్జాతీయంగా రేట్లు పెరగడమే అని కేంద్రం తెలిపింది. అయితే, సిలిండర్‌ ధరలు ఏమేర పెరిగాయ్‌? చమురుపై సుంకాల వల్ల ప్రభుత్వానికి ఎంత ఆదాయం సమకూరింది? అంటూ పార్లమెంటులో ఓ సభ్యుడు అడిగిన ప్రశ్నకు కేంద్రమంత్రి ధర్మేంద్ర ప్రధాన్‌ లిఖిత పూర్వక సమాధానం ఇచ్చారు. గత ఏడేళ్లలో పెట్రోల్​, డీజిల్​పై సుంకాలు 459 శాతం పెరిగాయని పేర్కొన్నారు.

ఇంధన ధరల పెంపుపై కేంద్ర పెట్రోలియంశాఖ మంత్రి ధర్మేంద్ర ప్రధాన్​ సోమవారం కీలక వివరాలు వెల్లడించారు. గత ఏడేళ్లలో పెట్రోల్​, డీజిల్​పై సుంకాలు 459శాతం పెరిగాయని తెలిపారు. వంట గ్యాస్​ ధరలు రెండితలు అయ్యాయని పేర్కొన్నారు. 2014 మార్చి 1 నాటికి.. 14.2 కేజీల సిలిండర్ ధర రూ.410.5 కాగా ఆ ధర ప్రస్తుతం రూ.819గా ఉందని తెలిపారు. సిలిండర్‌ ధరలు ఏమేర పెరిగాయ్‌? చమురుపై సుంకాల వల్ల ప్రభుత్వానికి ఎంత ఆదాయం సమకూరింది? అంటూ అడిగిన ప్రశ్నకు లోక్​సభలో సోమవారం ఇచ్చిన లిఖిత పూర్వక సమాధానంలో ఈ విషయాలను వెల్లడించారు.

"ప్రజా పంపిణీ వ్యవస్థ ద్వారా అందుబాటులో ఉన్న కిరోసిన్​ ధర మార్చి 2014లో రూ.14.96(లీటరుకు) ఉంటే అది ప్రస్తుతం రూ.35.35కు పెరిగింది. పెట్రోల్‌పై రూ.32.90, డీజిల్‌పై రూ.31.80 ఎక్సైజ్‌ సుంకాన్ని కేంద్రం విధిస్తోంది. 2018లో పెట్రోల్‌పై రూ.17.98, డీజిల్‌పై రూ.13.83గా ఈ పన్నులుండేవి. అంతర్జాతీయ మార్కెట్ల ధరలకు అనుగుణంగా రేట్లు సవరించే విధానం అమల్లోకి వచ్చిన నేపథ్యంలో చమురు కంపెనీలు వాటి ధరలు పెంచుతున్నాయి."

-ధర్మేంద్ర ప్రధాన్, పెట్రోలియం మంత్రి

వేల కోట్ల నుంచి లక్షల కోట్లకు..

2013లో పెట్రోల్​, డీజిల్​పై సుంకాల ద్వారా రూ. 52,537 కోట్లు వసూలు చేయగా, 2019-20 మధ్య ఆ మొత్తం రూ. 2.13 లక్షల కోట్లకు చేరిందని మంత్రి వెల్లడించారు. ఈ ఆర్థిక ఏడాదిలో ఆ ఆదాయం రూ. 2.94 లక్షల కోట్లకు పెరిగిందని పేర్కొన్నారు. పెట్రోల్​, డీజిల్​, ఏటీఎఫ్, నేచురల్ గ్యాస్, ముడి చమురుపై సుంకాల ద్వారా వచ్చిన ఆదాయం 2016-17 మధ్య రూ.2.37 లక్షల కోట్లగా ఉందని తెలిపారు. 2020-21 ఏప్రిల్​ నుంచి జనవరి మధ్య ఈ ఆదాయం రూ. 3.01 కోట్లకు చేరిందని వెల్లడించారు.

ఇదీ చదవండి :చమురు ధరలపై ఆందోళన- రాజ్యసభ రెండుసార్లు వాయిదా