ఉచితంగా జియో బ్రాడ్​బ్యాండ్ సేవలు

కరోనా విజృంభిస్తున్న నేపథ్యంలో జియో తన కస్టమర్లకు మరో ఆఫర్ ప్రకటించింది. కొత్త వినియోగదారులకు బ్రాడ్​బ్యాండ్ కనెక్టివిటీని ఎలాంటి రుసుం లేకుండా అందించనున్నట్లు తెలిపింది. ఇదివరకే కనెక్షన్ తీసుకున్న వినియోగదారులకు రెట్టింపు డేటా ఇవ్వనున్నట్లు పేర్కొంది.

కరోనా వేగంగా విస్తరిస్తున్న వేళ టెలికాం సంచలనం జియో మరో ఆఫర్​తో ముందుకొచ్చింది. కొత్త వినియోగదారులకు ఉచిత బ్రాడ్​బ్యాండ్ కనెక్టివిటీ ఇవ్వనున్నట్లు ప్రకటించింది. ఇప్పటికే కనెక్షన్ తీసుకున్న కస్టమర్లకు రెట్టింపు డేటా సౌలభ్యం కల్పించనున్నట్లు వెల్లడించింది. కరోనా ప్రభావంతో ఇంటి నుంచి పనిచేస్తున్న వారికి మద్దతుగా ఈ ఆఫర్​ తీసుకొచ్చినట్లు జియో పేర్కొంది. భౌగోళిక సాధ్యాసాధ్యాలకు లోబడి ఉచిత సేవలు అందించనున్నట్లు స్పష్టం చేసింది.

"ఇంట్లో ఉన్నప్పుడు అందరూ తమ సంబంధాలను కొనసాగించేలా బేసిక్ జియో ఫైబర్ బ్రాడ్​బ్యాండ్ కనెక్షన్​ను(10 ఎంబీపీఎస్​ వరకు) జియో ఎలాంటి సర్వీస్ ఛార్జీలు లేకుండా ఈ(కరోనా వైరస్) కాలవ్యవధిలో అందిస్తుంది. హోమ్​ గేట్​వే రూటర్లను సైతం అతి తక్కువ డిపాజిట్​తో(రీఫండబుల్) జియో అందిస్తుంది."

-జియో సంస్థ

జియో ఫైబర్ కనెక్షన్​ కోసం ఇన్​స్టాలేషన్​ సమయంలో కస్టమర్లు రూ.2,500 చెల్లించాల్సి ఉంటుంది. ఇందులో రూ.1,500 కనెక్షన్ రద్దు చేసుకున్నప్పుడు తిరిగి చెల్లిస్తారు.

ఇప్పటికే 4జీ డేటా ఓచర్లతో రెట్టింపు డేటా ఆఫర్​ను ప్రకటించింది జియో. ప్రస్తుత పరిస్థితుల్లో... అన్ని సమయాల్లో సేవలు కొనసాగేలా చర్యలు తీసుకుంటున్నట్లు స్పష్టం చేసింది.

ప్రభుత్వ రంగ సంస్థలైన బీఎస్​ఎన్​ఎల్, ఎంటీఎన్​ఎల్ ఉచిత బ్రాడ్ బ్యాండ్ ప్లాన్లు, అదనపు డేటా అందిస్తున్నట్లు వారం క్రితమే ప్రకటించాయి.

ఇదీ చదవండి:త్వరలో ఉద్దీపన పథకం ప్రకటించనున్న కేంద్రం