భారీగా తగ్గిన కండోమ్ విక్రయాలు- కారణం అదేనా?

ప్రపంచ దేశాలను ఆర్థిక మాంద్యం వణికిస్తోంది. ఈ ప్రభావం కండోమ్​లపై పడింది. దక్షిణ అర్జెంటీనాలో ప్రజలు నిత్యవసరాలు కొనుగోలు చేయలేని పరిస్థితి నెలకొంది. చివరికి కండోమ్​ కొనేందుకు వెనకడుగు వేస్తున్నారని తయారీ దారులు చెబుతుండటం ఆర్థిక మాంద్యం దుస్థితికి అద్దం పడుతోంది.

దక్షిణ అమెరికాలో రెండో అతిపెద్ద ఆర్థిక వ్యవస్థ అర్జెంటీనాను ఆర్థిక మాంద్యం పట్టి పీడిస్తోంది. డాలర్‌తో పోలిస్తే అర్జెంటైన్‌ కరెన్సీ పెసో విలువ పడిపోతుండడం.. ద్రవ్యోల్బణం భారీ స్థాయిలో నమోదు కావడం వల్ల జనాల జేబులు ఖాళీ అవుతున్నాయి. నిత్యావసరాలు సహా ఏదీ కొనలేని పరిస్థితి నెలకొంది. చివరికి కండోమ్‌ కొనేందుకు కూడా ప్రజలు వెనకడుగు వేస్తున్నారని వాటి తయారీ దారులు, ఔషధ దుకాణాల యజమానులు చెబుతున్నారు.

ఈ ఏడాది కండోమ్‌ల అమ్మకాలు 8 శాతం, గర్భ నిరోధక మాత్రల అమ్మకాలు 6 శాతం మేర పడిపోవడం ఆర్థిక మాంద్యం దుస్థితికి అద్దం పడుతోంది.

అర్జెంటీనాలో ప్రముఖ నటుడైన గిల్లెర్మో అక్వినో ఓ వీడియోలో మాట్లాడుతూ.. "పెసో విలువ దిగజారిపోవడం నన్ను బాధిస్తోంది. కనీసం నా భాగస్వామిని కూడా సుఖపెట్టలేకపోతున్నాను. నా దగ్గర ఒకే ఒక కండోమ్‌ మిగిలింది. ఇదంతా ప్రస్తుత ఆర్థిక పరిస్థితి వల్లే తలెత్తింది’’ అని అన్నాడు. ఈ వీడియో విపరీతంగా వైరల్‌ అయింది.

36 శాతం పెరిగిన ధర..

నిరోధ్‌లు తయారు చేసేందుకు వాడే సరకును ఆయా సంస్థలు దిగుమతి చేసుకుంటుండడం.. పెసో విలువ దిగజారిపోవడం వల్ల కండోమ్‌ల ధరలు భారీగా పెరిగాయి. ఈ ఏడాది ప్రారంభం నుంచి వీటి ధర 36 శాతం పెరిగిందని కండోమ్‌ తయారీ సంస్థలైన తులిపాన్‌, జెంటిల్‌మన్‌ వెల్లడించాయి. నెలకు దాదాపు 1.44 లక్షల మంది మహిళలు గర్భనిరోధక మాత్రలు వాడడం మానేశారని అర్జెంటీనా ఫార్మాస్యూటికల్ కాన్ఫెడరేషన్ తెలిపింది.

నిపుణుల ఆందోళన..

ఈ పరిస్థితిపై అక్కడి వైద్య నిపుణులు ఆందోళన చెందుతున్నారు. కండోమ్‌లు లేకుండా లైంగిక చర్యలకు ఉపక్రమిస్తే సుఖ వ్యాధులు ప్రబలే అవకాశముందని వారు హెచ్చరిస్తున్నారు. ప్రభుత్వం ఆసుపత్రుల్లో ఉచితంగా కండోమ్‌లు పంపిణీ చేయాలని ఓ హెచ్‌ఐవీ వ్యతిరేక ఉద్యమ సంస్థ డిమాండ్​ చేసింది.

ఇదీ చూడండి: ఇరాక్​లో బాంబు దాడి.. 12 మంది మృతి