జీవితకాల గరిష్ఠానికి బంగారం ధరలు

బంగారం ధర జీవితకాల గరిష్ఠాన్ని తాకింది. దిల్లీలో 10 గ్రాముల పసిడి వెల 35 వేల 970 రూపాయలకు చేరింది. కొనుగోళ్లకు వినియోగదారులు ఆసక్తి చూపినందున పసిడి ధర ఒకేరోజు వంద రూపాయల పెరిగింది.

దేశ రాజధాని దిల్లీలో బంగారం ధర జీవితకాల గరిష్ఠానికి చేరింది. సోమవారం భారీగా కొనుగోళ్లు పెరిగినందున ఒకే రోజు రూ.100 పెరిగింది. ఫలితంగా 10 గ్రాముల పసిడి వెల రూ. 35,970కు చేరిందని 'ఆల్​ ఇండియా సరాఫా అసోషియేషన్​(ఏఐఎస్​ఏ)' తెలిపింది.

దిల్లీలో 24, 22 క్యారెట్ల బంగారం ధరలు రూ.100 మేర పెరిగాయి. ఫలితంగా 10 గ్రాముల వెల వరుసగా రూ. 35,970, రూ. 35,800 కు చేరాయి. ఇదే బాటలో 8 గ్రాముల బంగారు నాణెం ధర రూ. 27,500కు వెళ్లింది.

"ఈ రోజు 10 గ్రాముల బంగారం ధర రూ.35,970 కు చేరింది. పసిడి జీవితకాలంలో ఇదే అత్యధికం"
- సురేంద్ర జైన్​, ఏఐఎస్​ఐ ఉపాధ్యక్షుడు

వెండి ధరలూ పసిడి బాటలోనే పయనించాయి. కిలో వెండి రూ.260 పెరిగి 41,960 కు చేరింది. పారిశ్రామికవేత్తలు, నాణేల తయారీదారులు కొనుగోళ్లకు ఆసక్తి చూపడమే ఇందుకు కారణమని ఏఐఎస్​ఏ ప్రకటించింది.

దేశ రాజధానిలో 100 వెండి నాణేల అమ్మకం ధర రూ.85,000 ఉండగా... కొనుగోలు ధర రూ. 84,000 ఉంది.

ఫ్లాట్​గా...

అంతర్జాతీయంగా బంగారం, వెండి ధరలు ఫ్లాట్​గా ముగిశాయి. ఔన్సు(దాదాపు 28 గ్రాములు) బంగారం, వెండి ధరలు వరుసగా 1,425, 16.40 అమెరికా డాలర్లు వద్ద ట్రేడింగ్ ముగించాయి.