ప్రపంచంలోని ఉత్తమ నగరాలు-2021 జాబితాలో భారతదేశ రాజధాని న్యూదిల్లీ 62వ స్థానం దక్కించుకుంది. భారత్ నుంచి ఈ ఒక్క నగరం మాత్రమే అందులో నిలవడం గమనార్హం. గత ఏడాది ఈ జాబితాలో దిల్లీ 81వ స్థానం దక్కించుకుంది. ఈ ఏడాది అభివృద్ధి దిశగా అడుగులు వేసి 62కు చేరుకోవడం విశేషం.
డెస్టినేషన్‌ డెవలప్‌మెంట్‌, బ్రాండింగ్, మార్కెటింగ్, డిజైన్, టూరిజం, డేటా, ట్రావెల్ రిపోర్ట్స్‌ తదితర విషయాల్లో ప్రత్యేకతలు కలిగిన వాంకోవర్‌కు చెందిన రెసోనాన్స్ కన్సల్టెన్సీ లిమిటెడ్ సంస్థ ఈ ర్యాంకింగ్‌ను నిర్ణయించింది. నగరం ఖ్యాతి, పరిస్థితులు, పోటీతత్వం తదితర అంశాల్ని పరిగణలోకి తీసుకుని ప్రతిభావంతులు, సందర్శకులు, వ్యాపారవేత్తల అభిప్రాయల ఆధారంగా ఈ ర్యాంకును ప్రకటించారు. ప్రపంచంలోని మొత్తం నగరాల్లో ఉత్తమంగా ఉన్న 100 సిటీలకు ర్యాంకులు ఇచ్చారు.