cryptocurrency news: క్రిప్టోకరెన్సీలు దేశ ఆర్థిక స్థిరత్వంపై ప్రభావం చూపుతున్నందున వాటి నియంత్రించే అంశంపై కేంద్రం ప్రభుత్వం సమతుల్యమైన నిర్ణయాన్ని తీసుకుంటుందని కేంద్ర ప్రభుత్వ ముఖ్య ఆర్థిక సలహాదారు సంజీవ్ సన్యాల్ తెలిపారు. ప్రస్తుతానికి క్రిప్టో కరెన్సీపై మన దేశంలో నియంత్రణలు కానీ, బ్యాన్ కానీ లేదు. కేంద్రం ప్రవేశపెట్టిన 2021-22 ఆర్థిక సర్వేలో ఈ విషయంపై ప్రభుత్వం తాను ఎలాంటి నిర్ణయాలు తీసుకుంటుందో ప్రకటించలేదు. అయితే ఆర్థిక సర్వేపై జరిగిన మీడియా సమావేశంలో మాట్లాడారు.
'గత కొద్ది రోజులుగా క్రిప్టో కరెన్సీపై చర్చలు నడుస్తున్నాయి. ఇటు ప్రభుత్వ వర్గాల్లోనూ.. అటు పార్లమెంట్లోనూ చర్చిస్తున్నాం. అయితే ఈ ఆర్థిక సర్వేలో మరోసారి ఈ విషయం చర్చకు వచ్చే అవకాశం ఉంద'ని సంజీవ్ అన్నారు. ఇది దేశ ఆర్థిక స్థిరత్వంపై ప్రభావం చూపిస్తుందని ఇప్పటికే రిజర్వ్ బ్యాంక్ ఆందోళన వ్యక్తం చేస్తుందని సంజీవ్ తెలిపారు. ఆర్థిక స్థిరత్వానికి సంబంధించి కొన్ని సమస్యలు ఉన్నాయని.. కానీ ఇన్నోవేషన్ పరంగా చేసిన ఇతర వాదనలు కూడా వినిపిస్తున్నాయని తెలిపారు. దీనిపై త్వరలోనే సమతుల్యమైన నిర్ణయం తీసుకోనున్నట్లు పేర్కొన్నారు.