మహీంద్ర ఆమె ఫొటో కోసం అంత వెతికారా..?

ట్విట్టర్​లో​ ఎంతో చురుగ్గా ఉంటారు మహీంద్ర గ్రూపు ఛైర్మన్​ ఆనంద్​ మహీంద్ర. సందేశాత్మక, సరదా ట్వీట్లు ఎన్నో పోస్టు చేస్తుంటారు. రీట్వీట్​​ చేస్తుంటారు. స్ఫూర్తిదాయక కథనాలను పంచుకుంటారు. ఈ మధ్యకాలంలో ఒక అమ్మాయి ఫొటో కోసం వెతికి.. మొత్తానికి ట్విట్టర్​లో ఓ వ్యక్తి ద్వారా పొందారు. ఎవరా అమ్మాయి?

ఆనంద్​ మహీంద్ర నిత్యం బిజీబిజీగా ఉండే వ్యాపారవేత్త. మహీంద్ర సంస్థల ఛైర్మన్​. ఎంత తీరిక లేకుండా ఉన్నా.. ట్విట్టర్​లో మాత్రం చాలా చురుకుగా ఉంటారు. సామాజిక విషయాల నుంచి సరదా సంఘటనల వరకు.. స్ఫూర్తిదాయక అంశాల నుంచి కళాత్మక వీడియోల వరకు... అన్నింటినీ ట్విట్టర్​లో పంచుకుంటారు. ఆయన ట్వీట్లతో సెలబ్రిటీలైన సామాన్యులు ఉన్నారు.

ట్వీట్లతో మహీంద్ర ఆలోచింపజేస్తారు. హాస్యం పండిస్తారు. అలాంటి ఆయన ఈ మధ్య కాలంలో ఓ ఫొటో కోసం తెగ వెతికేశారు. ఆ ఫొటో ఎవరిది? ఈ మధ్యకాలంలో ఆయన చేసిన ఆసక్తికర ట్వీట్లు ఏవి..?

ఆ ఫొటో దొరికితే స్ర్కీన్​సేవర్​గా పెట్టుకుంటా...

ఈ నెల ఆరో తేదీన కేరళలోని త్రిస్సుర్​లో ఓ పదో తరగతి విద్యార్థిని ఫైనల్స్​ పరీక్షలు రాసేందుకు గుర్రంపై స్వయంగా స్వారీ చేస్తూ వెళ్లింది. ఆ వీడియో సామాజిక మాధ్యమాల్లో బాగా వైరల్​ అయింది. ఆ వీడియోను ఆనంద్​ మహీంద్ర చూశారు. ట్విట్టర్​లో షేర్​ చేశారు. ఆ అమ్మాయిని అభినందించారు.

"త్రిస్సుర్​లో ఎవరికైనా ఈ అమ్మాయి తెలుసా? ఆ అమ్మాయి, ఆమె గుర్రం ఫొటోలు నాకు కావాలి. నేను స్క్రీన్​సేవర్​గా పెట్టుకుంటా. ఆమె నా హీరో. ఆమె పాఠశాలకు వెళుతున్న విధానం, పట్టుదల చూస్తే భవిష్యత్తులో సమస్యలపై పోరాడేందుకు నాలో ఆశావాదం పెరుగుతోంది."
-- ఆనంద్​ మహీంద్ర ట్వీట్​

ఈ ట్వీట్​తో ఆ బాలిక మరింత ఖ్యాతిగాంచింది. వేల మంది ఆయన ట్వీట్​కు స్పందించారు. సుబిన్​ అనే వ్యక్తి ఆయనకు మెయిల్​ ద్వారా కృష్ణ అనే ఆ అమ్మాయి ఫొటో పంపారు.

"త్రిస్సుర్​లో పరీక్ష రాసేందుకు పాఠశాలకు గుర్రంపై వెళ్లిన కృష్ణ అనే స్ఫూర్తిదాయక విద్యార్థిని వీడియో గురించి నేను కొంతకాలం క్రితం ట్వీట్​ చేశా. స్క్రీన్​సేవర్​గా పెట్టుకునేందుకు ఫొటో కావాలని అడిగా. మెయిల్​ ద్వారా ఇప్పుడు ఫొటో అందుకున్నా. సుబిన్​కు​ ధన్యవాదాలు."
-- ఆనంద్​ మహీంద్ర ట్వీట్​

రాజకీయ సభలో ఒకేఒక్కడు..

ఈ నెల 10న ఓ ఫొటోను ట్వీట్​ చేశారు మహీంద్ర. అది ఓ రాజకీయ సమావేశం. వేదికపై ఒకరు ప్రసంగిస్తుండగా.. ఓ ఐదుగురు కుర్చీలపై కూర్చున్నారు. అయితే ఆయన ప్రసంగం వినేందుకు ఒక్కరు మాత్రమే కింద కూర్చుకున్నారు. ఈ ఫొటో షేర్​ చేస్తూ సరదా ట్వీట్​ చేశారు మహీంద్ర.

"ప్రచారం ముగిసింది. ఎవరో నాకు ఈ ఫొటో వాట్సప్​లో పంపారు. ఇదెక్కడ జరిగిందో తెలియదు. ఎప్పుడు జరిగిందో తెలియదు. కానీ ఈ ఫొటో ప్రజాస్వామ్యంలో అద్భుతాన్ని చూపుతోంది. ప్రజలతో నిండిపోయిన చాలా ఫొటోల కంటే ఇది చాలా మేలైంది. ప్రతి ఒక్కరికీ అభిప్రాయాలు ఉంటాయి. ఎవరో 'ఒకరు' కచ్చితంగా వింటారు."
-- ఆనంద్​ మహీంద్ర ట్వీట్​

రెస్టారెంట్​కు భార్యతో వెళ్లేందుకు ఆలోచించాల్సిందే

చైనాలోని ఓ రెస్టారెంట్​ మెనూ ఫొటోను ట్విట్టర్​లో పెట్టారు మహీంద్ర. అందులో డెలీషియస్​ రోస్టెడ్​ హస్బెండ్​ అనే వంటకం పేరు చైనీస్​, ఇంగ్లిష్​లో ఉంది. దీనిపై సరదా వ్యాఖ్య చేశారు.

"ఈ రెస్టారెంట్​కు నా భార్యతో వెళ్లేందుకు ఒకటికి రెండుసార్లు బాగా ఆలోచించాలి. ఆమెకు ఏ సృజనాత్మక ఆలోచన రాకూడదని కోరుకుంటున్నా."
-- ఆనంద్​ మహీంద్ర ట్వీట్​

చౌకైన టాప్​ ఉండే వాహనమిదేనేమో..

బైక్​పై వెళుతూ ఎండ వేడి నుంచి తప్పించుకునేందుకు అట్టపెట్టతో చేసిన వినూత్న ప్రయోగం ఫొటోను ట్వీట్​ చేశారు మహీంద్ర.

"ఎండ చాలా తీవ్రంగా ఉంది. సృజనాత్మక ఆలోచనున్న మనవారికి వేడిని ఎలా జయించాలో తెలుసు. రోడ్డు రవాణా సంస్థ వారు ఇవి తయారో చేస్తారో లేదో తెలియదు. ఇంతవరకు నేను చూసిన తెలివైన, చౌకైన సాఫ్ట్​టాప్​ వాహనం ఇదే."
-- ఆనంద్​ మహీంద్ర ట్వీట్