చీమల దండయాత్ర, చూపు కోల్పోతున్న పశువులు, వలస వెళ్తున్న ప్రజలు

చీమలు మనల్నేం చేస్తాయిలే అనుకుంటాం. కానీ ఎల్లో క్రేజీ యాంట్స్ అనే రకం చీమలు తమిళనాడులో బీభత్సం సృష్టిస్తున్నాయి. వీటి వల్ల కొందరు ఇతర ప్రాంతాలకు వలస వెళ్లిపోతున్నారు. పశువులు చూపు కోల్పోతున్నాయి.

Yellow Crazy Ants: చీమలే కదా..! నలిపేస్తే పోతాయని అనుకుంటాం. కానీ అవి లక్షల సంఖ్యలో గుంపులుగా దండెత్తి వస్తే మనుషులు పారిపోవాల్సిందే! తమిళనాట అటవీ ప్రాంతాల్లోని పలు గ్రామాల్లో ఇదే పరిస్థితి తలెత్తింది. ఇక్కడ చీమలు బీభత్సం సృష్టిస్తున్నాయి. దండులా దండెత్తుతున్న ఈ చీమలు ఏది కనబడితే దాన్ని తినేస్తుండటంతో ప్రజలు బెంబేలెత్తుతున్నారు. కొందరు ఇతర ప్రాంతాలకు వలస పోతున్నారు. కరంతమలై రిజర్వ్‌ ఫారెస్టు చుట్టుపక్కల ప్రాంతాల్లో 'ఎల్లో క్రేజీ యాంట్స్‌' అనే చీమలు విజృంభిస్తున్నాయి.

ఎల్లో క్రేజీ యాంట్స్‌ వల్ల చూపు కోల్పోయిన మేక

సన్నగా.. చిన్నగా ఉండే ఈ చీమలు చాలా చురుగ్గా కదులుతుంటాయి. ఇవి చిన్నచిన్న కీటకాలను, పురుగులను చంపేస్తుంటాయి. స్థానిక జాతుల కీటకాలు, చీమల పుట్టల్ని ఆక్రమించి వాటిని నాశనం చేస్తుంటాయి. ఒకటని కాదు ఏది దొరికితే దానిని తినేస్తాయి. ప్రస్తుతం దిండుక్కల్‌ జిల్లా కరంతమలై రిజర్వ్‌ ఫారెస్ట్‌ పరిసరాల్లోని సుమారు ఏడు గ్రామాలపై దండయాత్ర చేస్తున్నాయి. పంటపొలాల్ని నాశనం చేస్తుండటంతోపాటు రైతులకు చెందిన మేకలు, పశువులు, ఎద్దులకు హాని చేస్తున్నాయి. ఎలుకలు, పిల్లులు, కుందేళ్లనూ స్వాహా చేస్తున్నాయి. పాములు, బల్లులను గుంపులుగా చుట్టుముట్టి అవలీలగా భోంచేస్తున్నాయి. పశువులకు గాయాలైన చోట్ల మాంసాన్ని తినేస్తున్నాయి. వీటి ప్రభావంతో కొన్ని పశువులు చనిపోయాయని స్థానికులు ఆందోళన వ్యక్తం చేస్తున్నారు. మేకలు, పశువులు చూపు కోల్పోతున్నాయి.

నిలువునా చుట్టేస్తాయ్‌..
ఈ చీమల బెడద గతంలో ఎప్పుడూ లేదని వేలాయుధంపట్టి వాసులు చెబుతున్నారు. అడవుల నుంచి లక్షల సంఖ్యలో ఇవి గ్రామాల్లోకి వచ్చేస్తున్నాయి. చల్లటి వాతావరణంలో వీటి దాడి మరింత ఎక్కువగా ఉంటోంది. వీటి ప్రభావంతో ఇక్కడి జనజీవనం అస్తవ్యస్తమైంది. ఇంటినుంచి బయటికి రావడానికే భయపడుతున్నారు. ఎక్కడైనా నిల్చుంటే చాలు సెకన్లలోనే శరీరం పైకి పాకేస్తున్నాయి. ఇవి కుట్టవు.. కరవవు.. కానీ పొత్తికడుపు కొన వద్ద ఉండే ఒక చిన్న గొట్టం ద్వారా ఇవి భయంకరమైన ఫార్మిక్‌ యాసిడ్‌తో కూడిన ద్రవాన్ని వెదజల్లుతుంటాయి. ఆ యాసిడ్‌ పడినచోట దురద, చర్మం పొట్టులా రాలడం వంటి సమస్యలు వస్తాయి. పశుపక్ష్యాదుల కంట్లో పడితే చూపు పోతుంది. కుంటల్లో నీళ్లు తెచ్చుకోవాలన్నా అక్కడా వేల సంఖ్యలో చీమలుంటున్నాయని, తమ రోజువారీ జీవనం దుర్భరంగా మారిందని స్థానికులు ఆవేదన వ్యక్తం చేస్తున్నారు. చీమల మందు వంటివి చల్లుతున్నా వాటి తీవ్రత తగ్గడం లేదని చెప్పారు.

శాస్త్రవేత్తల పరిశోధనలు..
ప్రజల నుంచి పెద్దఎత్తున ఫిర్యాదులు వస్తుండటం, కొందరు ఇతర ప్రాంతాలకు వలస వెళ్తుండటంతో కీటక శాస్త్రవేత్తలు, అటవీశాఖ అధికారులు వీటిపై దృష్టిపెట్టారు. నమూనాల్ని సేకరించి పరిశోధనకు పంపడంతోపాటు వాటి నైజాన్ని పరిశీలిస్తున్నారు. ఇవి అత్యంత ప్రమాదకరమైనవని, ఇంటర్నేషనల్‌ యూనియన్‌ ఫర్‌ కన్జర్వేషన్‌ ఆఫ్‌ నేచర్‌ (ఐయూసీఎన్‌) ప్రకారం ప్రపంచంలోని తొలి 100 ప్రమాదకర జాతుల్లో వీటిని చేర్చారని పర్యావరణవేత్త, వైల్డ్‌లైఫ్‌ పరిశోధకురాలు అశోక చక్రవర్తి చెప్పారు. 'ఎల్లో క్రేజీ యాంట్స్‌' దాడులు గతంలో కేరళ అడవుల్లోని పలు గ్రామాల్లో కనిపించాయి. వాటిపై 'సెంట్రల్‌ యూనివర్సిటీ ఆఫ్‌ కేరళ' ప్రతినిధులు పరిశోధనలు చేశారు. గతంతో పోల్చితే ఇప్పుడు ఈ చీమల జాతుల విస్తరణ బాగా పెరుగుతోందని శాస్త్రవేత్తలు తెలిపారు. తాము పరిశోధన చేసిన అడవుల్లో గొంగళి పురుగులు, సీతాకోకచిలుకలు, ఇతర పురుగులు, ఈగల సంతతి తగ్గినట్లు గుర్తించామన్నారు. ఆసియా, ఆస్ట్రేలియా, పశ్చిమ ఆఫ్రికాలో ఇవి ఎక్కువగా కనిపిస్తుంటాయి. 5 మి.మీ. వరకు పొడవు ఉంటాయి. పొడవైన కాళ్లు, తల మీద పొడవైన యాంటెన్నా లాంటివి ఉంటాయి. పసుపువన్నెలో ముదురు గోధుమ వర్ణంతో ఉంటాయి. 80 రోజుల వరకు బతుకుతాయి.

ఆస్ట్రేలియా ఆలోచనలు విజయవంతం..
ఆస్ట్రేలియాలోని క్రిస్‌మస్‌ ఐలాండ్‌లోకి అడుగుపెట్టిన ఈ చీమలు అక్కడుండే లక్షలాది ఎర్ర పీతలను చంపి తినేశాయి. దీనివల్ల పర్యావరణ సమతుల్యత దెబ్బతింది. దీంతో అక్కడ వాటిపై చాలా పరిశోధనలు చేసి కొన్ని పరిష్కారాల్ని కనుగొన్నారు. వాటి నివారణకు హెలికాప్టర్ల ద్వారా మందుల్ని పిచికారి చేశారు. 95-99 శాతం ఫలితాలొచ్చాయని అక్కడి శాస్త్రవేత్తలు చెబుతున్నారు. చిన్న తుమ్మెదలాంటి కీటకం ద్వారా సహజ పద్ధతిలోనే ఈ చీమల ఆహార గొలుసును తుంచి వాటి సంతతి పెరగకుండా చూడడంపైనా పరిశోధనలు జరుగుతున్నాయి.

ఇవీ చదవండి:ఇంట్లో బంగారు నిధి, గుట్టుగా పంచుకున్న కూలీలు, తప్పతాగి నోరుజారేసరికి