ప్రయాణంలోనే మహిళ ప్రసవం- వెనక్కి తిరిగొచ్చిన రైలు

ఓ గర్భిణీ తాను ప్రయాణిస్తున్న రైలులోనే బిడ్డకు జన్మనిచ్చింది. మహిళకు పురిటినొప్పులు ప్రారంభం కాగానే.. రైలును చైన్ లాగి ఆపేశారు. బిడ్డకు జన్మనిచ్చిన తర్వాత.. రైలును అధికారులు వెనక్కి పిలిపించారు.

ఝార్ఖండ్​లో (Jharkhand news) ఓ మహిళ రైల్లోనే బిడ్డకు జన్మనిచ్చింది. స్టేషన్ నుంచి రైలు బయల్దేరిన కొద్దిసేపటికే మహిళ ప్రసవించింది. స్టేషన్​కు రెండున్నర కిలోమీటర్ల దూరంలో ఆగిన రైలును.. మహిళ కోసం వెనక్కి మళ్లించారు. ప్రస్తుతం తల్లి, బిడ్డ ఆరోగ్యంగానే ఉన్నట్లు వైద్యులు చెప్పారు.

రైల్లో జన్మించిన శిశువు

వివరాలు ఇలా..

రాణు దాస్ అనే మహిళ ఒడిశా వెళ్లేందుకు సంపర్క్ క్రాంతి ఎక్స్​ప్రెస్ ఎక్కారు. ఎస్5 కోచ్​లో తన కుటుంబ సభ్యులతో కలిసి ప్రయాణిస్తున్నారు. దిల్లీ నుంచి వచ్చిన ఈ రైలు.. బుధవారం తెల్లవారుజామున 3.55 గంటలకు జంషెద్​పుర్ సమీపంలోని టాటానగర్ స్టేషన్​కు (Jharkhand Tatanagar news) చేరుకుంది. 4.10 గంటలకు ప్లాట్​ఫాం నుంచి బయల్దేరింది. స్టేషన్ దాటిన అనంతరం ఆమెకు పురిటినొప్పులు ప్రారంభమయ్యాయి. దీంతో తన కుటుంబ సభ్యులు చైన్​ లాగి రైలును ఆపారు. ఈ క్రమంలో మహిళ రైల్లోనే ప్రసవించింది. రైలు ఆగినట్లు తెలుసుకున్న ఆర్​పీఎఫ్ సిబ్బంది.. టాటానగర్ రైల్వే అధికారులకు సమాచారం అందించారు. తర్వాత మహిళ ప్రసవం గురించి వారికి తెలిసింది.

టాటానగర్ రైల్వే స్టేషన్

టాటా నగర్ రైల్వే స్టేషన్​ (Tatanagar railway station) దాటి రెండున్నర కిలోమీటర్ల దూరంలో ఆగిన రైలు... 150 కి.మీ దూరంలోని తర్వాతి స్టేషన్ అయిన హిజ్లికి చేరుకోవాలంటే కనీసం రెండున్నర గంటలు పడుతుంది. మహిళ పరిస్థితిని అర్థం చేసుకున్న అధికారులు సంపర్క్ క్రాంతి ఎక్స్​ప్రెస్​ను వెనక్కి పిలిపించారు. టాటానగర్​ స్టేషన్​లో అంబులెన్సును ఏర్పాటు చేసి.. మహిళను ఖాస్మహాల్ సర్దార్ ఆస్పత్రికి తరలించారు. అక్కడి నుంచి శిశువును ఎంజీఎం ఆస్పత్రికి పంపించారు. ప్రస్తుతం వీరిద్దరూ సురక్షితంగా ఉన్నారు.

ఈ కారణంగా రైలు గంట ఆలస్యంగా ప్రయాణించిందని అధికారులు తెలిపారు. ఉదయం 5.10 గంటలకు టాటానగర్ స్టేషన్ నుంచి బయల్దేరిందని చెప్పారు.

ఇదీ చదవండి: