'ఈసీ నోటీసును లెక్కచేసే ప్రసక్తే లేదు'

సీఆర్​పీఎఫ్​ జవాన్లు భాజపాకు అనుకూలంగా ప్రచారం చేస్తున్నారని, వారు అలా చేయడం మానేవరకు తాను ఇలానే మాట్లాడతానని బంగాల్​ సీఎం మమతా బెనర్జీ స్పష్టం చేశారు. ఈసీ ఇచ్చిన నోటీసును లక్ష్యపెట్టేది లేదని అన్నారు.

ఈసీ ఇచ్చిన నోటీసును లక్ష్యపెట్టేది లేదని బంగాల్​ సీఎం మమతా బెనర్జీ తేల్చిచెప్పారు. సీఆర్​పీఎఫ్​ జవాన్లు భాజపాకు అనుకూలంగా ప్రచారం చేస్తున్నారని, వారు అలా చేయడం ఆపేవరకు తాను ఇలానే మాట్లాడతానని స్పష్టం చేశారు. పూర్వ బర్ద్​మాన్​లోని జమల్​పుర్​ ర్యాలీలో మమత ఈ వ్యాఖ్యలు చేశారు. తృణమూల్​ కాంగ్రెస్​ చెప్పే ఏ విషయాన్నైనా ఎన్నికల సంఘం పట్టించుకోవట్లేదని మండిపడ్డారు.

"భాజపాకు అనూకూలంగా సీఆర్​పీఎఫ్ వ్యవహరిస్తోంది. ఈసీ పక్షపాతం వీడేంతవరకు నేను ఇలానే మాట్లాడతా. మీ(ఈసీ) నోటీసుల్ని లెక్కపెట్టేదే లేదు."

-మమతా బెనర్జీ, బంగాల్​ సీఎం

"బంగాల్​లో ప్రధాని నరేంద్ర మోదీ పరీక్ష పే చర్చ నిర్వహించారు. అది ఎన్నికల నియమావళిని ఉల్లంఘించినట్లు కాదా?" అని మమత ప్రశ్నించారు.

మమతకు ఈసీ నోటీసులు

బంగాల్‌లో అసెంబ్లీ ఎన్నికల సందర్భంగా కేంద్ర బలగాల మోహరింపుపై మార్చి 28న, ఈ నెల 7న చేసిన వ్యాఖ్యలపై వివరణ ఇవ్వాలని ఈసీ ఆదేశించింది. కేంద్ర బలగాలపై విమర్శల ద్వారా పలు ఐపీసీ సెక్షన్లను మమత ఉల్లంఘించారని నోటీసుల్లో స్పష్టం చేసింది. వీటిపై శనివారం ఉదయం 11 గంటల్లోగా వివరణ ఇవ్వాలనిపేర్కొంది.

కేంద్ర పారామిలిటరీ బలగాలపై మమత పూర్తిగా తప్పుడు, రెచ్చగొట్టే రీతిలో, అసంబద్ధమైన వ్యాఖ్యలు చేశారని ఈసీ ప్రాథమిక విచారణలో తేలింది. మత ప్రాతిపదికన ఓట్లు అడిగారనే ఆరోపణలపై మమతకు గతంలోనూ ఎన్నికల సంఘం నోటీసులు జారీచేసింది.

ఇదీ చదవండి:మమతా బెనర్జీకి మరోసారి ఈసీ నోటీసులు