నవంబరు 16న తెరుచుకోనున్న శబరిమల ఆలయం

భక్తుల కోసం నవంబరు 16న శబరిమల ఆలయం (Sabarimala Temple Opening) తెరుచుకోనుంది. కొవిడ్​ నేపథ్యంలో గతేడాది ఏర్పాటు చేసిన వర్చువల్​ క్యూ సిస్టమ్​ను ఈ సంవత్సరం కూడా కొనసాగించనున్నట్లు ప్రభుత్వం స్పష్టం చేసింది.

కేరళలోని శబరిమల అయ్యప్ప దేవస్థానం (Sabarimala Temple Opening) భక్తుల కోసం తెరుచుకోనుంది. మండల మకరవిళక్కు పండగ సీజన్​ సందర్భంగా నవంబరు 16 నుంచి భక్తులను అనుమతించనున్నారు. రోజుకు 25వేల మంది భక్తులను మాత్రమే అనుమతించనున్నట్లు ఆ రాష్ట్ర ముఖ్యమంత్రి పినరయి విజయన్ గురువారం స్పష్టం చేశారు. పరిస్థితులను గమనించి భక్తుల సంఖ్య పెంపుపై నిర్ణయం తీసుకుంటామని సీఎం తెలిపారు.

కొవిడ్​ నేపథ్యంలో గతేడాది ఏర్పాటు చేసిన వర్చువల్​ క్యూ సిస్టమ్​ను ఈ సంవత్సరం కూడా కొనసాగించనున్నట్లు ప్రభుత్వం స్పష్టం చేసింది. ఈసారి 10 ఏళ్లలోపు, 65 ఏళ్లు పైబడిన వారిని కూడా (Sabarimala Temple Opening) అనుమతించనున్నట్లు తెలిపింది. టీకా పొందినట్లు ధ్రువపత్రం చూపించినవారితో పాటు, కరోనా ఆర్​టీపీసీఆర్ నెగెటివ్ రిపోర్టు ఉన్నవారికే దేవస్థానంలోకి ప్రవేశించేందుకు అనుమతి ఇస్తున్నారు.

నెయ్యాభిషేకం కార్యక్రమానికి కూడా అన్ని ఏర్పాట్లు చేసేందుకు ఆలయ బోర్డు నిశ్చయించింది. ఆ రోజు దర్శనం అనంతరం భక్తులు సన్నిధానంలో ఉండేందుకు అనుమతిని నిరాకరించింది. దీర్ఘకాలిక వ్యాధులతో బాధపడుతున్నవారు హెల్త్​ చెక్​అప్​ చేయించుకుని ఆలయానికి రావాలని సూచించింది.

రవాణాకు సంబంధించి గతేడాది నిబంధనలనే కొనసాగించనున్నట్లు ప్రభుత్వం స్పష్టం చేసింది. వాహనాలను నీలక్కల్​ వరకే అనుమతిస్తామని.. అక్కడి నుంచి ప్రభుత్వ బస్సులు అందుబాటులో ఉంటాయని పేర్కొంది.

ఇదీ చూడండి :లఖింపుర్​ ఘటనలో కేంద్ర మంత్రి తనయుడికి సమన్లు