వాట్సాప్ ప్రైవసీ విధానంపై అనుమానాలు రేకెత్తిన వేళ ఉగ్రసంస్థలు ఇతర మెసేజింగ్ వేదికలపై కన్నేశాయి. భారత భద్రతా దళాల నిఘా నుంచి తప్పించుకునేందుకు మూడు సరికొత్త అప్లికేషన్లను వినియోగిస్తున్నారు ఉగ్రవాదులు. పట్టుబడిన తీవ్రవాదుల నుంచి అధికారులు వాటి వివరాలను సేకరించారు. పాకిస్థాన్కు చెందిన ఉగ్రవాద సంస్థలతో సంప్రదింపులు జరపడానికి వీటిని వినియోగిస్తున్నట్లు తెలిసింది.
ఆ మూడు దేశాలకు చెందినవి...
మూడు మెసేజింగ్ యాప్లలో ఒకటి అమెరికాకు చెందిన సంస్థ కాగా రెండోది ఐరోపా, మూడోది టర్కీకి చెందినదిగా గుర్తించారు. కశ్మీర్ లోయలో ఉగ్రవాదులు తమలో చేరబోయే వారితో చర్చించడానికి టర్కీ యాప్ను తరచుగా వాడుతున్నట్లు సమాచారం. భద్రత సమస్యల దృష్ట్యా యాప్ల పేర్లను అధికారులు వెల్లడించలేదు.
పాత సాంకేతిక..
ఇంటర్నెట్ వేగం నెమ్మదిగా ఉన్నప్పటికీ సమర్థంగా పనిచేసేలా ఈ మూడు యాప్లను రూపొందించారు. 2జీ నెట్వర్క్ వినియోగించే రోజుల్లో వాడిన ఎన్హాన్స్డ్ డేటా ఫర్ గ్లోబల్ ఎవల్యూషన్ (ఎడ్జ్) సాంకేతికనే ఇవి వినియోగిస్తున్నాయి.
ఫేస్బుక్, వాట్సాప్లను వాడటం ఉగ్రసంస్థలు పూర్తిగా మానేశాయి. ప్రస్తుత మెసేజింగ్ యాప్లలో ఎన్క్రిప్షన్, డిక్రిప్షన్ రెండూ పరికరంలోనే జరుగుతాయి. కాబట్టి ఏ సమయంలోనూ ఇతరులు జోక్యం చేసుకోవడానికి వీలుపడదు. ఎన్క్రిప్షన్ కోసం అత్యంత భద్రమైనదిగా భావించే ఆర్ఎస్ఏ-2048 ఆల్గరిథమ్ను వీటిల్లో వినియోగిస్తున్నారు.
పూర్తి గోప్యంగా..
ఉగ్రవాదులు వినియోగించే ఈ మెసేజింగ్ యాప్లలో కనీసం వినియోగదారుల ఫోన్ నంబర్, ఈమెయిల్ కూడా అడగవు. అందువల్ల వారి వివరాలు ఎవరికీ తెలిసే అవకాశముండదు. జమ్ముకశ్మీర్లో ఇలాంటి అప్లికేషన్లను నిషేధించడానికి ప్రయత్నాలు జరుగుతున్నాయి. ఇప్పటికే వర్చువల్ సిమ్ల ముప్పునకు వ్యతిరేకంగా పోరాడుతున్న భద్రతా దళాలకు ఈ యాప్లు మరింత తలనొప్పిగా మారాయి.
ఇదీ చూడండి:పౌరుల గోప్యత ప్రభుత్వాల బాధ్యత
