Murrah Buffalo Dharma : ఏజ్​ 3ఏళ్లు.. డైలీ 15లీటర్ల పాలు.. అందాల పోటీల్లో ఎన్నో ప్రైజ్​లు.. రాష్ట్రంలో అందమైన గేదె ఇదే!

Murrah beauty Buffalo Dharma Special Story : అందంలోనూ, పాల ఉత్పత్తిలోనూ ఔరా అనిపిస్తోంది హరియాణాకు చెందిన ఓ ముర్రా జాతి గేదె. రోజుకు 15 లీటర్ల వరకు పాలు ఇస్తోంది. అందాల పోటీల్లోనూ పలు బహుమతులు అందుకుంది. ఆ ప్రత్యేకమైన గేదె గురించి ఇప్పుడు తెలుసుకుందాం.

Murrah beauty Buffalo Dharma Special Story :హరియాణాలోని భివానీ జిల్లాలో ఓ ముర్రా జాతి గేదె.. రోజుకు 15 లీటర్ల పాలు ఇస్తోంది. కేవలం పాల విషయంలోనే కాకుండా అందంలోనూ అందరినీ ఆకట్టుకుంటోంది. వివిధ రాష్ట్రాల్లో నిర్వహించిన గేదెల అందాల పోటీల్లో పలు బహుమతులు సైతం అందుకుంది. దీంతో హరియాణా వ్యాప్తంగా ప్రాచుర్యం పొందింది ఈ గేదె. ఈ ముర్రా జాతి గేదెకు ముద్దుగా ధర్మ అని పేరు పెట్టుకున్నాడు యజమాని.

ధర్మ యజమాని పేరు సంజయ్​. చిన్నప్పటి అది అతడి వద్దే పెరిగింది. ప్రస్తుతం ధర్మ వయసు మూడు సంవత్సరాలు. దానికి ఓ దూడ కూడా ఉంది. ధర్మ కారణంగా లాభాలు వస్తున్పప్పటికీ.. దాని పోషణకు కూడా అదే స్థాయిలో ఉందని చెబుతున్నాడు సంజయ్. మంచి ధర వస్తే ధర్మను విక్రయించేందుకు సిద్ధమని తెలిపాడు.

ధర్మ గేదె

దాదాపు రూ.61లక్షలకు ఈ ముర్రా జాతి గేదెను అమ్ముతానని సంజయ్​ చెబుతున్నాడు. రోజూ పచ్చిగడ్డి, వివిధ రకాల గింజలు, 40 కిలోల క్యారెట్లను థర్మకు ఆహారంగా పెడతానని అతడు పేర్కొన్నాడు. హరియాణా సరిహద్దు ప్రాంతాల్లో ఉన్న పంజాబ్​, ఉత్తర్​ప్రదేశ్​ రాష్ట్రాల్లో నిర్వహించిన పలు అందాల పోటీల్లో ధర్మ బహుమతులు సాధించిందని వివరించాడు. "థర్మ చాలా అందంగా ఉంటుంది. ఇది చిన్న ఏనుగు వలే కనిపిస్తుంది. బహుశా హరియాణా రాష్ట్రంలోనే ఈ గేదె అందమైనది కావచ్చు" అని పశువైద్యులు డాక్టర్ హృతిక్ తెలిపారు.

ధర్మ గేదె

ముర్రా గేదెలు హరియాణాలో బాగా ప్రాచుర్యం పొందాయని కర్నాల్ పశుసంవర్ధక శాఖ అధికారి డాక్టర్ ధర్మేంద్ర సింగ్ తెలిపారు. అయితే కేవలం భారత్​లో కాకుండా విదేశాల్లోనూ వీటికి మంచి ఆదరణ ఉందని వారు వెల్లడించారు. సాధారణ గేదెలతో పోలిస్తే.. ముర్రా జాతి గెదేలు ఎక్కువ పాలు ఇస్తాయని ఆయన వివరించారు. సగటున రోజుకు 15 నుంచి 20 లీటర్లు ఇస్తాయని ధర్మేంద్ర సింగ్ వెల్లడించారు. ఈ రకం గేదెలకు మంచి పోషణ అందిస్తే 30 వరకు ఇస్తాయని ఆయన పేర్కొన్నారు. వీటి పాలల్లో మంచి పోషకాలు, 40 శాతం వరకు ప్రోటీన్లు ఉంటాయని ధర్మేంద్ర పేర్కొన్నారు.