మహారాష్ట్ర నవి ముంబయిలో నవజాత శిశు విక్రయాలకు పాల్పడుతున్న ముఠా గుట్టు రట్టు చేశారు పోలీసులు. ఈ ఘటనలో వైద్యుడు సహా మరో ముగ్గురు మహిళలను అరెస్ట్ చేశారు. వైద్యుడిని.. నగరంలోని కామోతే ప్రాంతంలో ఫ్యామిలీ హెల్త్ కేర్ క్లినిక్ నడుపుతున్న పంకజ్ పాటిల్గా అధికారులు గుర్తించారు.
ప్రణాళిక ప్రకారమే
కామోతే సెక్టార్ 8లో క్లినిక్ మాటున పంకజ్.. రూ.4 లక్షలకు నవజాత శిశువులను అమ్ముతున్నట్లు పోలీసులకు సమాచారం అందింది. దీంతో ఆ వైద్యుడిని పట్టుకునేందుకు పోలీసులు వల పన్నారు. వారి వ్యూహం ప్రకారం నాయక్ మంథాన్ పాటిల్ అనే వ్యక్తి.. శిశువును కొనుగోలు చేసేందుకు పంకజ్ ఆస్పత్రికి వెళ్లారు. డాక్టర్ పాటిల్ డిమాండ్ చేసిన రూ.4 లక్షల మొత్తాన్ని కూడా తీసుకెళ్లాడు. డబ్బు చూసిన డాక్టర్.. పసికందును విక్రయించాలని భావించే మహిళలకు ఫోన్ చేసి క్లినిక్‌కి రమ్మని చెప్పాడు. తలోజాకు చెందిన ముగ్గురు మహిళలు ఆడబిడ్డతో క్లినిక్‌కి వెళ్లారు. ఒప్పందం ప్రకారం.. డాక్టర్ పాటిల్ వద్ద డబ్బు తీసుకొని శిశువును అప్పగించాడు.
వెంటనే క్లినిక్ వెలుపల తన బృందంతో సిద్ధంగా ఉన్న అసిస్టెంట్ ఇన్‌స్పెక్టర్ మహలా.. ఆ ముగ్గురు మహిళలు సహా వైద్యుడిని అరెస్టు చేశారు.
