ఓ లేడీ కండక్టర్ సమయస్ఫూర్తితో వ్యవహరించి ఇద్దరి ప్రాణాలు కాపాడారు. కదులుతున్న బస్సులో ఉన్నట్టుండి ఓ గర్భిణీకి పురిటి నొప్పులు రాగా.. కండక్టర్ ఆమెకు సహాయం చేసి నార్మల్ డెలివరీ అయ్యేటట్టు చేశారు. ఆ తర్వాత బస్సులోని ప్రయాణికుల వద్ద నుంచి రూ.1,500 సేకరించి ఆమెకు ఆర్థికసాయం చేశారు. ఈ ఘటన కర్ణాటకలో జరిగింది.
కేఎస్ఆర్టీసీకి చెందిన ఓ బస్సు సోమవారం మధ్యాహ్నం బెంగళూరు నుంచి చిక్కమగళూరు వెళ్తోంది. ఆ సమయంలో బస్సులో దాదాపు 45 మంది ప్రయాణికులు ఉన్నారు. వారిలో ఓ నిండు గర్భిణీ కూడా ఉంది. అయితే బస్సు వెళ్తున్న సమయంలో ఆ గర్భిణీకి ఒక్కసారిగా పురిటి నొప్పులు మొదలయ్యాయి. చాలా కిలోమీటర్ల వరకు ఎటువంటి ఆస్పత్రులు లేవు. దీంతో చేసేదేమీ లేక మహిళా కండక్టర్ బస్సును రోడ్డు పక్కన ఆపించి.. ప్రయాణికులందరినీ కిందకు దిగమని చెప్పింది. ఆ తర్వాత బస్సులోనే ఆమెకు ప్రసవం చేసింది. దీంతో గర్భిణీ పండంటి ఆడ బిడ్డకు జన్మనిచ్చింది.
ఆర్థిక సమస్యల కారణంగా ఆ గర్భిణి ప్రైవేట్ వాహనంలో ఆస్పత్రికి వెళ్లలేక కేఎస్‌ఆర్‌టీసీ బస్సులో ప్రయాణించింది. విషయం తెలుసుకున్న కండక్టర్.. బస్సులోని ప్రయాణికుల వద్ద నుంచి రూ.1,500 సేకరించి ఆమెకు ఆర్థిక సహాయం చేశారు. అనంతరం ఆమె తన బిడ్డతో కలిసి అంబులెన్సులో దగ్గర్లో ఉన్న ఆస్పత్రికి వెళ్లింది. ప్రస్తుతం తల్లీబిడ్డా ఆరోగ్యంగా ఉన్నారు. సకాలంలో స్పందించి తల్లి, బిడ్డ ప్రాణాలు కాపాడి మానవత్వాన్ని చాటుకున్న కండక్టర్ గురించి తెలుసుకున్న కర్ణాటక రాష్ట్ర రోడ్డు రవాణా సంస్థ కమిషనర్, సిబ్బంది ఆమెకు అభినందనలు తెలిపారు.