పినరయి విజయన్​ ఆస్తుల వివరాలివే..

కేరళ ముఖ్యమంత్రి పినరయి విజయన్ తన ఆస్తుల విలువ 54లక్షల రూపాయలుగా పేర్కొన్నారు. ఈ మేరకు ఎన్నికల అఫిడవిట్​లో తన నికర ఆస్తులను ప్రకటించారు.

కేరళ ముఖ్యమంత్రి పినరయి విజయన్ తన ఆస్తుల విలువ రూ.54 లక్షలని వెల్లడించారు. వీటిలో రెండు ప్లాట్లు సహా.. రూ.51.95 లక్షలు విలువైన స్థిరాస్తులున్నట్లు తెలిపారు. కన్నూర్​ జిల్లా ధర్మదామ్​ నియోజకవర్గం నుంచి నామినేషన్​ వేసిన ఆయన.. ఎన్నికల అఫిడవిట్​లో ఈ వివరాలను పేర్కొన్నారు.

పినరయి చరాస్తుల వివరాలు:

• ఎస్​బీఐ-తలసేరి శాఖలోని తన బ్యాంకు ఖాతాలో రూ.78 వేలు నగదు.
• మలయాళ కమ్యూనికేషన్ లిమిటెడ్‌లో రూ.10,000 విలువ చేసే 1000 షేర్లు.
• కన్నూర్ అంతర్జాతీయ విమానాశ్రయంలో రూ.లక్ష విలువైన షేర్లు.

2020-21లో వివిధ మార్గాల్లో రూ.2,87,860 ఆదాయం సమకూరినట్లు అఫిడవిట్​లో పేర్కొన్నారు.

సీబీఐ ప్రత్యేక న్యాయస్థానంలో రెండు కేసులు పెండింగ్​లో ఉన్నట్లు నామినేషన్​లో పేర్కొన్న పినరయి.. వీటిలో ప్రస్తుతం ఒక కేసు సుప్రీంకోర్టు పరిధిలో ఉందని తెలిపారు.

భార్య పేరిట..

తన భార్య కమల పేరిట రూ.35 లక్షల విలువైన ఆస్తులున్నట్లు పినరయి తెలిపారు. ఎస్​బీఐ-తలసేరి శాఖలోని ఆమె ఖాతాలో రూ.5,47,803 నగదు ఉందన్నారు.

ప్రతిపక్ష నేత ఆస్తులు..

కేరళ శాసనసభ ప్రతిపక్ష నేత రమేష్​ చెన్నితల తన ఆస్తుల విలువ రూ.1.23కోట్లుగా ప్రకటించారు. ఇందులో రూ.76లక్షల 20 వేల 620 విలువైన స్థిరాస్తులున్నట్లు వెల్లడించారు.

కేరళలోని 140 నియోజకవర్గాలకు ఏప్రిల్ 6న(ఒకే దశలో) ఎన్నికలు జరగనున్నాయి. మే 2న ఫలితాలు వెలువడనున్నాయి.

ఇదీ చదవండి:మమతా బెనర్జీ ఆస్తుల విలువెంతో తెలుసా?