చైనా, పాకిస్థాన్లను సమర్థంగా ఎదుర్కొనేందుకు ఎప్పటికప్పుడు తన ఆయుధ సంపత్తిని మెరుగుపరుచుకుంటున్న భారత్.. మరో కీలక ప్రయోగానికి సిద్ధమవుతోంది. బియాండ్ విజువల్ రేంజ్ ఎయిర్ టు మిసైల్(బీవీఆర్ఏఏఎం) రకానికి చెందిన 'అస్త్ర' మార్క్-2 క్షిపణిని ఈ ఏడాది రెండో అర్ధభాగంలో పరీక్షించనుంది. ఈ విషయాన్ని అధికారులు సోమవారం వెల్లడించారు. 2022 నాటికి క్షిపణి అందుబాటులోకి వస్తుందని భావిస్తున్నారు.
ఏంటీ అస్త్ర మిసైల్?
రష్యా, ఫ్రాన్స్, ఇజ్రాయెల్ తయారు చేసిన బీవీఆర్ఏఏఎం క్షిపణులనే భారత్ ఎక్కువగా ఉపయోగిస్తోంది. వీటికి ప్రత్యామ్నాయంగా 'అస్త్ర' క్షిపణులను డీఆర్డీఓ అభివృద్ధి చేసింది. ఇప్పటికే సుఖోయ్ యుద్ధ విమానం సాయంతో అస్త్ర మార్క్ 1ను విజయవంతంగా ప్రయోగించింది. ఈ క్షిపణిని తేజస్ యుద్ధవిమానానికి అనుసంధానించాలని యత్నిస్తోంది.
శబ్ద తరంగాలకు 4 రెట్ల వేగంతో అస్త్ర క్షిపణి ప్రయాణిస్తుంది. మార్క్-2 క్షిపణి సామర్థ్యం మార్క్ 1తో పోలిస్తే ఎక్కువ. 160 కిలోమీటర్ల లక్ష్యాన్ని సునాయాసంగా ఛేదించేలా శాస్త్రవేత్తలు దీనిని రూపొందిస్తున్నారు.
ఇదీ చదవండి :సైన్యం చేతికి అర్జున్‌ మార్క్-1ఏ యుద్ధ ట్యాంక్‌