దేశ పౌరులందరికీ ఆహార భద్రత కల్పించేందుకు ప్రభుత్వాలు పథకాలు ప్రవేశపెడుతున్నప్పటికీ అవి ఆశించిన స్థాయిలో ఫలితాలనివ్వటంలేదని (global hunger index 2021) ప్రపంచ ఆకలి సూచీ (గ్లోబల్‌ హంగర్‌ ఇండెక్స్‌- జీహెచ్‌ఐ) 2021 స్పష్టంచేస్తోంది. దేశంలో ఆహార నిల్వలు భారీగానే ఉన్నప్పటికీ క్షుద్బాధ, పోషకాహార లోపాలు వంటివి చిన్నారులనూ వెంటాడుతూనే ఉన్నాయి. 116 దేశాల జాబితాతో వెలువడిన ప్రపంచ ఆకలి సూచీలో (global hunger index 2021) భారత్ 101వ స్థానంలో ఉంది. పొరుగు దేశాలైన బంగ్లాదేశ్‌, నేపాల్, పాకిస్థాన్‌ ఇదే విభాగంలో ఉన్నప్పటికీ..మన కంటే మెరుగైన ర్యాంకులు సాధించాయి.
మరింత దిగజారింది..
గత ఏడాది ప్రపంచ ఆకలి సూచీలో (global hunger index 2021) 107 దేశాల వివరాలు వెల్లడి కాగా అప్పుడు మన దేశం 94వ స్థానంలో ఉంది. అంటే క్షుద్బాధ నివారణలో గత ఏడాది 93 దేశాలు మనకన్నా అగ్రభాగాన ఉంటే.. ఈ ఏడాది అటువంటి దేశాల సంఖ్య 100కి పెరిగింది. పర్యవేక్షణ కొరవడటం, పోషకాహార లోపాలను సరిదిద్దలేకపోవటం వంటివి మన దేశం వెనుకబాటుకు కారణాలుగా ఉన్నాయని విశ్లేషించారు.
- చైనా, కువైట్‌, బ్రెజిల్ తదితర 18 దేశాలు సంయుక్తంగా మొదటి స్థానంలో ఉన్నట్టు ప్రపంచ ఆకలి సూచీ వెబ్‌సైట్‌ వెల్లడించింది.
- దేశంలోని చిన్నారుల్లో ఎత్తుకు తగిన బరువులేని వారి శాతం 1998-2002 మధ్య 17.1గా ఉండగా.. 2016-2020 మధ్య ఈ సంఖ్య 17.3కి పెరిగిందని తెలిపింది.
- ప్రస్తుత గణాంకాల ప్రకారం 2030 నాటికి కూడా 47 దేశాలు తీవ్ర పోషకాహార సమస్యలు ఎదుర్కొంటాయని పేర్కొంది.