ఆరో అంతస్తులో పనిమనిషి నిర్బంధం-జారిపడి మృతి!

గతవారం కేరళలో ఓ భవంతి నుంచి జారిపడిన మహిళ ఓ ప్రైవేటు ఆసుపత్రిలో చికిత్స పొందుతూ మృతి చెందింది. ఫ్లాట్ యజమాని.. ఆ పనిమనిషిని అక్రమంగా నిర్బంధించడం వల్లే ఈ ఘటన జరిగిందని ఆరోపిస్తున్నారు కుటుంబ సభ్యులు. ఈ మేరకు కేసు నమోదు చేసిన పోలీసులు.. దర్యాప్తు చేస్తున్నారు.

కేరళ ఎర్నాకుళంలో గతవారం ఓ అపార్ట్​మెంట్​ నుంచి కిందకు దిగుతూ జారిపడిన పనిమనిషి.. ఓ ప్రైవేటు ఆసుపత్రిలో చికిత్స పొందుతూ మరణించింది. తమిళనాడులోని సేలంకు చెందిన కుమారి(55).. డిసెంబర్​ 5న భవంతిలోని ఆరో అంతస్తు బాల్కనీ ద్వారా దిగడానికి ప్రయత్నించి జారిపడింది. దీంతో తలకు తీవ్రగాయమైన ఆమెను సమీపంలోని ప్రభుత్వ ఆసుపత్రికి తరలించారు. అయితే అక్కడి వైద్యులు చేతులెత్తేయడంతో ఓ ప్రైవేటు ఆసుపత్రికి తీసుకెళ్లారు. ఐసీయూలో వెంటిలేటర్​పై చికిత్స పొందుతూ ఆదివారం మృతి చెందింది.

కుమారిని ఫ్లాట్​ యజమాని నిర్బంధించడం వల్లే ఇలా జరిగిందని.. అతనే ఈ మరణానికి కారణమని బాధితురాలి కుటుంబ సభ్యులు ఆరోపిస్తున్నారు. యజమాని అక్రమంగా నిర్బంధించారని బాధితురాలి భర్త, కుమారుడు చేసిన ఫిర్యాదు మేరకు పోలీసులు కేసు నమోదు చేశారు.

'బాధితురాలికి తన భర్త నుంచి ఫోన్​కాల్ వచ్చిన నేపథ్యంలో ఇంటికి వెళ్లాలని అభ్యర్థించగా.. అనుమతివ్వలేదు. అక్కడి నుంచి తప్పించుకునే ప్రయత్నంలో ఈ ఘటన జరిగింది. ఆ మహిళ రెండు చీరలను కట్టి, అపార్ట్​మెంట్​ బాల్కనీ నుంచి దిగడానికి ప్రయత్నించింది' అని పోలీసులు తెలిపారు. ఈ ఘటనపై విచారణకు ఆదేశించారు కొచ్చి నగర పోలీసు కమిషనర్​ విజయ్​ శంకర్​.

ఇదీ చూడండి:యూపీలో ఏడేళ్ల బాలికపై అత్యాచారం- ఇద్దరి అరెస్ట్​