స్నేహితులతో కలిసి అహ్మదాబాద్‌లోని ఆశారాం ఆశ్రమ సందర్శనకు వెళ్లిన హైదరాబాద్ యువకుడు విజయ్ యాదవ్ అదృశ్యమయ్యారు. సబర్మతి ప్రాంతంలోని ఆశ్రమంలో ఈ నెల 3న ఓ శిబిరానికి హాజరై రాజస్థాన్లోని జోధ్‌పుర్‌లో మరో శిబిరానికి వెళ్లిన యాదవ్ మళ్లీ అహ్మదాబాద్‌కు వచ్చి, కనిపించకుండా పోయారు. ఫోన్ స్విచ్చాఫ్‌ అయింది. దీనిపై పోలీసులకు ఫిర్యాదు అందగా.. కేసు నమోదు చేసుకొని దర్యాప్తు చేస్తున్నారు. కుటుంబ సభ్యులు కూడా అహ్మదాబాద్ చేరుకుని గాలిస్తున్నారు.
వివరాల ప్రకారం.. నవంబర్ 11 నుంచి విజయ్ ఆచూకీ గల్లంతైంది.
ఈటీవీ భారత్తో మాట్లాడిన విజయ్ కుటుంబసభ్యులు.. కన్నీరుమున్నీరవుతున్నారు. విజయ్ అదృశ్యంపై పలు అనుమానాలు వ్యక్తం చేస్తున్నారు.
''నవంబర్ 3న ఆశారాం ఆశ్రమంలో ఓ వర్క్షాప్లో పాల్గొనేందుకు విజయ్ అహ్మదాబాద్ వచ్చాడు. ఆ తర్వాత రాజస్థాన్లోని జోధ్పుర్ వెళ్లాడు. మళ్లీ అహ్మదాబాద్ ఆశ్రమానికి చేరుకున్నాడు. అప్పటినుంచి కనిపించడం లేదు. ఆశ్రమంలో రిజిస్టర్ చెక్ చేశాం. లోపలికి ప్రవేశించినట్లు ఉంది కానీ.. బయటికి ఎప్పటికి వెళ్లాడన్నది లేదు. అదే ఇప్పుడు ఆశ్రమం నుంచి విజయ్ ఎటు వెళ్లాడన్నది అంతుచిక్కని ప్రశ్న. సీసీటీవీ ఫుటేజీని అడిగితే.. నవంబర్ 11వ తేదీది మిస్ అయిందని అంటున్నారు. పోలీసులను ఆశ్రయించి.. ఫిర్యాదు చేశాం.''