మంగళవారం ఉదయం తీరం దాటనున్న 'తౌక్టే'

12:25 May 16

అతి తీవ్ర స్థాయికి బలపడిన తౌక్టే తుపాను సోమవారం సాయంత్రానికల్లా గుజరాత్ తీరాన్ని చేరుకుంటుందని వాతావరణ శాఖ వెల్లడించింది. పోర్​బందర్, మహువా(భావ్​నగర్ జిల్లా) వద్ద మంగళవారం ఉదయం తీరం దాటుతుందని పేర్కొంది. వచ్చే 24 గంటల్లో తుపాను మరింత తీవ్రంగా మారుతుందని పేర్కొంది. 

గోవాలోని పంజింకు దక్షిణ నైరుతి దిక్కున 130 కిమీ, ముంబయి దక్షిణాన 450 కిమీ, వెరావల్(గుజరాత్)కు దక్షిణ ఆగ్నేయాన 700 కిమీ, కరాచీ(పాకిస్థాన్)కి ఆగ్నేయాన 840 కిమీ దూరంలో తుపాను కేంద్రీకృతమై ఉందని వాతావరణ శాఖ వెల్లడించింది.

యడ్డీ సమీక్ష

తుపాను కర్ణాటక తీరం తాకిన నేపథ్యంలో ఆ రాష్ట్ర సీఎం యడియూరప్ప పరిస్థితులను సమీక్షించారు. తుపాను ప్రభావిత ప్రాంతాలను సందర్శించాలని ఇంఛార్జి మంత్రులను ఆదేశించారు. సహాయక చర్యలను దగ్గరుండి పరిశీలించారని స్పష్టం చేశారు. అత్యవసరమైతే మంత్రులకు నేరుగా ఫోన్ చేయాలని అధికారులకు సూచించారు.

షా సమావేశం

మరోవైపు, తుపాను ప్రభావిత ప్రాంతాలైన గుజరాత్, మహారాష్ట్ర సీఎంలతో కేంద్ర హోంమంత్రి అమిత్ షా భేటీ అయ్యారు. డామన్ డయ్యూ దాద్రా నగర్ హవేలీ అధికారులతో సమీక్ష నిర్వహించారు. తుపాను పరిస్థితులను ఎదుర్కొనేందుకు తీసుకున్న చర్యలను అడిగి తెలుసుకున్నారు.

10:54 May 16

నలుగురు మృతి

తౌక్టే తుపాను కారణంగా గడిచిన 24 గంటల్లో ఆరు జిల్లాలో భారీ నుంచి అతి భారీ వర్షాలు కురిశాయని కర్ణాటక విపత్తు నిర్వహణ అథారిటీ వెల్లడించింది. 73 గ్రామాలపై తీవ్ర ప్రభావం పడిందని తెలిపింది. వివిధ ఘటనల్లో నలుగురు ప్రాణాలు కోల్పోయారని స్పష్టం చేసింది.

10:26 May 16

గోవా తీరాన్ని తాకిన తుపాను

అతి తీవ్ర తుపానుగా మారిన తౌక్టే.. గోవా తీరాన్ని తాకింది. ఈ సమయంలో సముద్రంలో భారీ ఎత్తున అలలు ఎగసిపడ్డాయి. కొంకణ్ సహా పలు ప్రాంతాల్లో భీకర వర్షాలు కురుస్తున్నాయి. పలు చోట్ల చెట్లు విరిగిపోయాయి. రోడ్లకు ఇరువైపులా ఉన్న వృక్షాలు పడిపోవడం వల్ల.. రాకపోకలకు అంతరాయం ఏర్పడుతోంది.

08:23 May 16

అతి తీవ్ర తుపానుగా మారిన తౌక్టే

తీరంవైపు ముంచుకొస్తున్న 'తౌక్టే'.. అత్యంత తీవ్రమైన తుపానుగా మారిందని భారత వాతావరణ శాఖ తెలిపింది. గోవా-పంజింకు నైరుతి దిశగా 150 కిమీ, ముంబయికి దక్షిణ దిశగా 490 కిమీ దూరంలో తుపాను కేంద్రీకృతమైందని వెల్లడించింది. మే 18 తెల్లవారుజామున గుజరాత్​లోని పోర్​బందర్, మహువా వద్ద తీరం దాటుతుందని స్పష్టం చేసింది. 

04:36 May 16

తాక్టే తుపాను తీవ్రరూపం దాల్చి.. బీభత్సం సృష్టిస్తోందనే భయంతో  ఓ కొవిడ్​ కేర్​ సెంటర్​లోని 580 మంది కరోనా రోగులను సురక్షిత ప్రాంతాలకు తరలించారు మహారాష్ట్రలోని ముంబయి మున్సిపల్​ అధికారులు. సీఎం ఉద్ధవ్​ ఠాక్రే ఆదేశాల మేరకు ముందస్తు జాగ్రత్తగా ఈ చర్యలు చేపట్టినట్లు తెలిపారు.

00:17 May 16

తౌక్టే తుపాను.. కర్ణాటక తీరాన్ని తాకినట్లు ఆ రాష్ట్ర హోంమంత్రి బసవరాజ్​ బొమ్మై తెలిపారు. ఈ తుపాను ఎదుర్కోవడానికి రెండు జాతీయ విపత్తు ప్రతిస్పందన బృందాలను మోహరించినట్లు పేర్కొన్నారు. వీటితో పాటు మూడు రాష్ట్ర విపత్తు ప్రతిస్పందన బృందాలను కూడా రంగంలోకి దించినట్లు వెల్లడించారు. అలాగే తీర ప్రాంత జిల్లాల్లో 1000 మంది నిరంతరం పని చేయడానికి సిద్ధంగా ఉన్నారని చెప్పారు. 

రైళ్లు రద్దు

గుజరాత్‌లో తుపాను తీవ్రరూపంలో దాల్చనున్న నేపథ్యంలో ప్రయాణికుల భద్రతను దృష్టిలో ఉంచుకుని, 08401/08402 పూరి-ఓఖా-పూరి ప్రత్యేక రైళ్లను రద్దు చేసింది ఈస్ట్​కోస్ట్​ రైల్వే. ఈ రైళ్లు మే 16న పూరి నుంచి ఓఖ, మే 19న ఓఖా నుంచి పూరికి బయలుదేరాల్సి ఉంది.

మూడు గంటల్లో భారీ వర్షాలు

రాబోయే 3 గంటలు రాయ్‌గడ్ జిల్లాలోని పలు ప్రాంతాల్లో ఉరుములు, మెరుపులతో  కూడిన భారీ వర్షం పడే అవకాశముందని భారత వాతావరణ శాఖ తెలిపింది. అలాగే బలమైన గాలులు విచే అవకాశం ఉందని పేర్కొంది. ఈ నేపథ్యంలో ప్రజలు అప్రమత్తంగా ఉండాలని సూచించింది.