Bihar Caste Survey Results : బిహార్​ జనాభాలో ఓబీసీలు, ఈబీసీలు 63శాతం.. క్యాస్ట్ సర్వే రిలీజ్

Bihar Caste Survey Results : బిహార్​లో నిర్వహించిన కులగణన సర్వే వివరాలను ఆ రాష్ట్ర అధికారులు వెల్లడించారు. రాష్ట్ర జనాభాలో 63 శాతం కంటే ఎక్కువగా ఓబీసీలు, ఈబీసీలు ఉన్నట్లు తెలిపారు.

Bihar Caste Survey Results : బిహార్​ జనాభాలో 63 శాతం కంటే ఎక్కువగా ఓబీసీలు, ఈబీసీలు ఉన్నారని రాష్ట్రంలో నిర్వహించిన కులగణన సర్వే వెల్లడించింది. మొత్తం జనాభా 13.07కోట్లకు పైగా ఉన్నట్లు పేర్కొంది. యాదవ సామాజిక వర్గీయులు.. మొత్తం జనాభాలో 14.27 శాతం ఉన్నట్లు సర్వే తేల్చింది. నీతీశ్​ కుమార్​ ప్రభుత్వం నిర్వహించిన ఈ సర్వే డేటాను.. పట్నాలో జరిగిన విలేకరుల సమావేశంలో అడిషనల్​ చీఫ్​ సెక్రటరీ​ వివేక్ కుమార్​​ సింగ్ సోమవారం​ విడుదల చేశారు.

Bihar Caste Survey Data : మొత్తం రాష్ట్ర జనాభాలో 36 శాతం అత్యంత వెనుకబడిన, 27 శాతం వెనుకబడిన వర్గీయులు ఉన్నట్లు అధికారుల వెల్లడించారు. హిందువులు 81.9986%, ఇస్లాం 17.7088%, క్రిస్టియన్లు 0.0576% ఉన్నట్లు వివరించారు. 215 కులాల వివరాలను కూడా విడుదల చేశారు.

• యాదవులు- 14.2666%
• కుర్మీ- 2.8785%
• బ్రాహ్మణ- 3.6575%
• బనియా- 2.3155%
• భూమిహార్- 2.8683%
• రాజ్‌పుత్- 3.4505%
• ముసాహర్- 3.0872%
• మల్లాహ్​- 2.6086%

'వారందరికీ ప్రత్యేక అభినందనలు'
Caste Survey Bihar : "గాంధీ జయంతి సందర్భంగా రాష్ట్రంలో నిర్వహించిన కులగణన వివరాలను విడుదల చేశాం. ఈ కార్యక్రమంలో నిమగ్నమైన వారందరికీ ప్రత్యేక అభినందనలు. శాసనసభలో ఏకగ్రీవంగా కులగణన చేపట్టాలనే ప్రతిపాదన ఆమోదం పొందింది" అని ముఖ్యమంత్రి నీతీశ్​ కుమార్​ ట్వీట్​ చేశారు.

'ఈ గణాంకాలు దేశానికి ఆదర్శంగా నిలుస్తాయి'
"మహాత్ముడి జయంతి నాడు మనమంతా చారిత్రక ఘట్టంలో భాగమయ్యాం. బీజేపీ ఎన్నో కుట్రలు పన్నినా.. రాష్ట్ర ప్రభుత్వం కులగణన సర్వేను పూర్తి చేసింది. నేడు వివరాలను విడుదల చేసింది. అట్టడుగు వర్గాలకు ప్రాతినిథ్యం కల్పించడంలో ఈ గణాంకాలు దేశానికి ఆదర్శంగా నిలుస్తాయి" అని మాజీ సీఎం, ఆర్జేడీ అధినేత లాలూ ప్రసాద్​ యాదవ్ తెలిపారు.

'కులగణన కేవలం భ్రమే..'
రాష్ట్ర ప్రజల్లో కులగణన భ్రమను సృష్టించడం తప్ప మరేం చేయదని కేంద్ర మంత్రి గిరిరాజ్​ సింగ్​ విమర్శించారు. రాష్ట్రాన్ని 18 ఏళ్ల నితీశ్​ కుమార్​ పాలనతో పాటు లాలూ యాదవ్​ 15 ఏళ్ల పాలనలో అభివృద్ధి జరగలేదని నివేదిక ఇవ్వాల్సిందని ఎద్దేవా చేశారు. కుల గణన నివేదిక​ కంటి తుడుపు చర్య మాత్రమేనని ఆరోపించారు.

Caste Census Bihar :కుల గణన ద్వారా.. రాష్ట్రంలోని వివిధ కులాల అభ్యున్నతికి పాటుపడేందుకు వీలుగా వారి సామాజిక, ఆర్థిక స్థితిగతుల గురించి సమాచారం అందుబాటులో వస్తుందన్న అంచనాతో బిహార్​ ముఖమంత్రి సీఎం నీతీశ్‌ కుమార్‌ 2023 జనవరి 7న సర్వే ప్రారంభించారు. 2.9 కోట్ల కుటుంబాల్లోని 12.7 కోట్ల మంది వివరాలను ఆఫ్​లైన్​లో, మొబైల్​ అప్లికేషన్ ద్వారా ఆన్​లైన్​లో పొందుపర్చేందుకు బిహార్​ ప్రభుత్వం ఈ గణన చేపట్టింది.