ప్రపంచంలోని అతి పెద్ద మురికివాడల్లో ఒకటైన 'ధారావి' కొవిడ్ కట్టడిలో తీసుకున్న చర్యలను ప్రపంచబ్యాంక్ శ్లాఘించింది. వైరస్ నియంత్రణకు అక్కడి ప్రజలు చేపట్టిన వివిధ కార్యక్రమాలు అనుసరణీయమని కీర్తించింది. తన ద్వైవార్షిక నివేదికలో ఈ విషయాన్ని ప్రస్తావించింది. మే నుంచి జులై వరకు నమోదైన కేసుల సంఖ్యను పోల్చితే గరిష్ఠ స్థాయి నుంచి 20 శాతం మేర తగ్గినట్లు పేర్కొంది.
ముంబయిలోని ధారావిలో తొలి కరోనా కేసు ఏప్రిల్లో నమోదైంది. కేవలం 2.5 చ.కి.మీ కలిగిన ఈ ప్రాంతంలో ఆరు లక్షల యాభై వేల మంది నివాసం ఉంటారు. భౌతిక దూరం పాటించడం అసాధ్యమైన ఈ ప్రాంతం కరోనా కేసులకు కేంద్రబిందువుగా ఉండేది.
ఈ తరుణంలో స్థానిక అధికారులు పరీక్షల సంఖ్యను భారీగా పెంచారు. వైద్య శిబిరాలు ఏర్పాటు చేశారు. ఈ చర్యలను గుర్తించిన ప్రపంచ బ్యాంక్... అధికారులు, ఎన్జీఓలు చేసిన కృషిపై హర్షం వ్యక్తం చేసింది.