కొత్తగా అధికారం వచ్చిందన్న ఉత్సాహంలో ఇద్దరు మహిళా పోలీసులు రెచ్చిపోయారు. అమ్మాయిల పట్ల అసభ్యంగా ప్రవర్తించిన పోకిరీలపై చర్యలు తీసుకోవాల్సింది పోయి చేతికి చిక్కిన ఇద్దరు అమాయక బాలికలను తీవ్రంగా హింసించారు. ఇప్పుడా దృశ్యాలు సామాజిక మాధ్యమాల్లో వైరల్గా మారాయి. మహిళల రక్షణ పేరుతో ఏర్పడిన బృందం సభ్యులే అమ్మాయిలపై దాడి చేయటమేంటని జనం ప్రశ్నిస్తున్నారు.
ఈ ఘటన రాజస్థాన్ ప్రతాప్గఢ్ జిల్లా కేంద్రలో జరిగింది. పెట్రోలింగ్ నిర్వహిస్తున్న సమయంలో ఇద్దరు బాలికలు ఓ బాలుడితో మాట్లాడుతుండగా మహిళా కానిస్టేబుళ్లు చూశారు. బాలుడిని పట్టుకునేందుకు ప్రయత్నించగా అతనడు తప్పించుకుని పారిపోయాడు. ఆ కోపాన్ని బాలికలపై చూపించారు పోలీసులు.
ఠాణాకు తీసుకెళ్లే క్రమంలో ఇద్దరు బాలికలపై చేయి చేసుకున్నారు. కాలితో తన్నారు. బాలికలు కొట్టొద్దని ఎంత ఏడుస్తున్నా విడిచిపెట్టలేదు. దూరం నుంచి చూస్తున్న స్థానికులు వీడియో తీసి సామాజిక మాధ్యమాల్లో పెట్టడంతో విమర్శలు వెల్లువెత్తుతున్నాయి. బాలికల పట్ల అత్యుత్సాహం ప్రదర్శించిన మహిళా కానిస్టేబుళ్ల ప్రవర్తనను తప్పుపడుతున్నారు నెటిజన్లు.