ఆ ద్వయానికి ఏమైంది? వ్యూహాలకు పదును తగ్గిందా??

మోదీ-షా.. ఈ రాజకీయ ద్వయం వ్యూహాల ముందు అన్నీ దిగదుడుపే. ఒకప్పుడు పట్టుకుందల్లా బంగారమే. ప్రతి ఎన్నికలోనూ విజయమే. కానీ... ఇది గతం. 2018లో దేశంలోని 21 రాష్ట్రాల్లో అధికారంలో ​(ప్రత్యక్షంగా, సంకీర్ణంగా) ఉన్న భాజపా.. క్రమంగా పట్టుకోల్పోతోంది. ఎన్నో రాష్ట్రాల్లో పరాజయాలు.. కొన్నింటిలో మాత్రమే విజయాలు. 2019 సార్వత్రిక ఎన్నికలకు ముందు మొదలైన ఓటముల పరంపర కొనసాగుతూనే ఉంది. ఇందుకు కారణమేంటి? మోదీ-షా వ్యూహాల్లో పదును తగ్గిందా? రానున్న ఎన్నికలకు కమలదళం ఎలా సిద్ధమవుతోంది?

"మోదీకి ఎదురేలేదు... ఎక్కడ చూసినా కాషాయ ప్రభంజనమే.. వ్యూహరచనలో షా-మోదీ ద్వయాన్ని మించినోళ్లు లేరు"... రెండేళ్ల కిందట భాజపా విజయాలను చూసిన ఎందరో రాజకీయ విశ్లేషకులతో పాటు సామాన్య జనం నోట వచ్చిన మాటలివి. నిజంగా అంతలా ఆధిపత్యం ప్రదర్శించింది భాజపా.

2014లో తొలిసారి నరేంద్ర మోదీ ప్రధానిగా ఎన్నికైన అనంతరం.. వరుసగా వచ్చిన రాష్ట్రాల అసెంబ్లీ ఎన్నికల్లో భాజపాదే విజయం. 2017లో ఒకానొక సమయంలో.. దేశంలోని 71 శాతం భూభాగంలో అధికారంలో ఉంది భాజపా. 2014లో తొలిసారి కేంద్రంలో అధికారం చేపట్టే సమయానికి భాజపా పాలిత రాష్ట్రాలు ఏడే. 2018 నాటికి ఆ సంఖ్యను 21కి తీసుకొచ్చింది.

అయితే.. ఇదంతా గతం. ఆ తర్వాతే భాజపాకు పరీక్షలు మొదలయ్యాయి. ఇప్పుడు వరుస ఎన్నికల్లో ఓటములతో డీలా పడిపోతోంది. ఇటీవలి మహారాష్ట్రలో అధికారాన్ని కోల్పోయిన నాటికి భాజపా పాలిత రాష్ట్రాల భూభాగం 40 శాతానికి పడిపోయింది. ఆ తర్వాత ఝార్ఖండ్​లో ఓటమితో ఇదింకా తగ్గింది.

5 రాష్ట్రాల ఎన్నికలతో మొదలు...

2019 సార్వత్రిక ఎన్నికలకు ముందు జరిగిన ఐదు రాష్ట్రాల అసెంబ్లీ ఎన్నికలతో భాజపా ఓటములు ప్రారంభమయ్యాయి. అప్పుడు మిజోరంలో గెలిచినా.. మధ్యప్రదేశ్​, రాజస్థాన్​, ఛత్తీస్​గఢ్​లో అధికారాన్ని కోల్పోయింది. తెలంగాణలోనూ ఓటమే. ఆ తర్వాత ఆంధ్రప్రదేశ్​లో ఎన్డీఏ నుంచి తెలుగు దేశం బయటకురాగా.. అక్కడా భాజపా అధికారానికి దూరమైనట్లయింది. 2018 డిసెంబర్​లో రాష్ట్రపతి పాలనతో జమ్ముకశ్మీర్​నూ కోల్పోయింది.

సార్వత్రికం తర్వాతా అదే....

అన్ని ఓటములు పలకరించినా.. ఆ తర్వాత జరిగిన 2019 సార్వత్రిక ఎన్నికల్లో రికార్డు స్థాయి విజయాన్ని సొంతం చేసుకుంది ఎన్డీఏ. సొంతంగానే ప్రభుత్వాన్ని ఏర్పాటు చేయగలిగిన మెజార్టీ సాధించింది. అయితే.. భాజపాకు ఆ ఆనందం ఎంతోకాలం నిలవలేదు. ఆ తర్వాతా పరాజయాల నుంచి బయటపడలేదు.

వరుసగా రాష్ట్రాల శాసనసభ ఎన్నికల్లో భాజపాకు ఓటములే ఎదురయ్యాయి. ఎన్నో నాటకీయ పరిస్థితుల నడుమ కర్ణాటకలో అధికారాన్ని సొంతం చేసుకున్నా.. మహారాష్ట్రలో షాక్​ తగిలింది. ఆ తర్వాత ఝార్ఖండ్​లోనూ ఎదురుదెబ్బే. కీలక రాష్ట్రాలన్నింటిలో అధికారానికి దూరమైన భాజపా.. తాజాగా దిల్లీలో గెలవలేకపోయింది.

పదును తగ్గిందా..?

అప్పుడు పనిచేసిన మోదీ పవనాలు- చాణక్యుడిగా పేరొందిన అమిత్​ షా ప్రభ ఏమైంది..? భాజపాకు విజయాలు ఎందుకు దూరమయ్యాయి? మోదీ-షా ద్వయం వ్యూహాల్లో పదునుతగ్గిందా? అనే సందేహాలు అందరిలో వ్యక్తమవుతున్నాయి. నిజంగానే భాజపాకు ఒక్కటంటే ఒక్క పెద్ద విజయమూ లేదు. ఇవన్నీ భాజపాను సందిగ్ధంలో పడేశాయి.

ముందున్న సవాళ్లు

వరుస పరాజయాలతో డీలా పడిపోయిన భాజపాకు మున్ముందు మరిన్ని కఠిన సవాళ్లు ఎదురుకానున్నాయి. బిహార్​లో ఈ ఏడాది చివర్లో ఎన్నికలకు సిద్ధమవుతోంది కమల దళం. అక్కడ నితీశ్​ కుమార్​ నేతృత్వంలోని జేడీయూతో కలిసి సంకీర్ణ ప్రభుత్వంలో ఉంది భాజపా. ఈ సారి అక్కడ గెలుస్తుందో లేదో చెప్పడం కష్టం.

ఆ తర్వాత.. బంగాల్​, అసోం, కేరళ, తమిళనాడు ఎన్నికలతో భాజపాకు కఠిన పరీక్ష ఎదురుకానుంది. ఇప్పుడు.. భాజపా ముందున్న సవాల్​ ఇదే. పార్టీ అధ్యక్షుడిగా ఇటీవలే బాధ్యతలు చేపట్టిన నడ్డాకు.. ఈ ఎన్నికలు కీలకం కానున్నాయి. ఆయన నేతృత్వంలోనైనా పార్టీ తిరిగి గాడిలో పడుతుందా లేదా అనేది చూడాలి.

పౌర నిరసనలు..

ఓటములకు తోడు.. దేశంలో పౌరసత్వ చట్టం, ఎన్​ఆర్​సీ, ఎన్​పీఆర్​లపై రగడ కొనసాగుతూనే ఉంది. దిల్లీ కేంద్రంగా ఎన్నో అల్లర్లు జరుగుతున్నాయి. తీవ్ర విధ్వంసానికి దారితీస్తున్నాయి. విమర్శించేందుకు విపక్షాలు ఎలాగూ ఉండనే ఉన్నాయి. ఇప్పటికే పౌరచట్టం, ఎన్​ఆర్​సీ, ఎన్​పీఆర్​పై తీవ్రస్థాయిలో విరుచుకుపడుతున్నాయి పలు పార్టీలు. ఈ తరుణంలో రానున్న అడ్డంకులను దాటుకొని ఎలా ముందుకెళ్లాలనే ఆలోచనలో పడింది భాజపా.

అయోధ్యతో..

రాజకీయంగా సున్నితమైన 'అయోధ్య రామ మందిరం ఏర్పాటు' భాజపాకు ఏమైనా మేలు చేయనుందా అనే ప్రశ్నలు ఉత్పన్నమవుతున్నాయి. సుప్రీం తీర్పు అనంతరం.. సరిగ్గా దిల్లీ ఎన్నికలకు 2 రోజుల ముందు అయోధ్య ట్రస్ట్​ ఏర్పాటుపై లోక్​సభలో ప్రకటన చేశారు ప్రధాని మోదీ. అయితే.. అది ఆ పార్టీకి రాజకీయంగా ఎలాంటి ప్రయోజనం చేకూర్చలేదని తాజాగా స్పష్టమైంది. మరి రామ మందిరాన్ని వీలైనంత త్వరగా నిర్మించి.. పరిస్థితుల్ని తనకు అనుకూలంగా మార్చుకోగలుగుతుందా? లేదా? అనేది వేచిచూడాలి.

ఇవీ చూడండి: