ఆగ్రాలో ట్రంప్​ చేతికి 600 గ్రాముల వెండి తాళం- ఎందుకంటే...

అమెరికా అధ్యక్షుడికి భారత పర్యటన అత్యంత ప్రత్యేకంగా ఉండేలా ఏర్పాట్లు చేస్తోంది ప్రభుత్వం. ఫిబ్రవరి 24న భారత్​లో అడుగుపెట్టిన దగ్గరనుంచి.. తిరిగి వెళ్లే వరకు ఆయనకు చిరకాలం గుర్తుండిపోయేలా చూడాలనుకుంటోంది మోదీ సర్కార్​. అహ్మదాబాద్​తో మొదలు ఆగ్రా, దిల్లీలోనూ ట్రంప్​కు ఆతిథ్యాన్ని అద్భుతంగా తీర్చిదిద్దుతున్నారు. అగ్రరాజ్య అధ్యక్షుడి కోసం కట్టుదిట్టమైన భద్రతా వ్యవస్థను ఏర్పాటు చేస్తున్నారు.

అమెరికా అధ్యక్షుడు డొనాల్డ్ ట్రంప్​ భారత పర్యటనలోని ప్రతి క్షణం ఆయనకు గుర్తుండిపోయేలా అధికారులు ఏర్పాట్లు చేస్తున్నారు. అహ్మదాబాద్​ మోటేరా స్టేడియంలో భారీ ఎత్తున నిర్వహించ తలపెట్టిన నమస్తే ట్రంప్​ కార్యక్రమంపై ఇప్పటికే అమెరికా అధ్యక్షుడు ఆనందంతో ఉబ్బితబ్బిబ్బైపోయారు.

పర్యటనలో భాగంగా ఫిబ్రవరి 24న ట్రంప్​ ఆగ్రాకు వెళ్లి ప్రపంచ వింతల్లో ఒకటైన తాజ్​ మహల్​ను సందర్శించనున్నారు. ఈ సందర్భంగా ట్రంప్ ​లోపలకు ప్రవేశించే ముందు ఆయనకు 600గ్రాములు బరువైన వెండి తాళాన్ని బహుమానంగా ఇవ్వనుంది ఉత్తర్​ప్రదేశ్​ సర్కార్​. 'గేట్లు తెరిచి.. ఆగ్రాలోకి స్వాగతం పలుకుతున్నాం' అనే సందేశం ఇచ్చేలా ఇలా ఏర్పాటు చేశారట అధికారులు. ఈ మేరకు ఆగ్రా మేయర్​ నవీన్​ జైన్​ వెల్లడించారు.

సుందరంగా తయారైన ఆగ్రా..

ట్రంప్​ మెప్పు పొందేందుకు యూపీ సర్కార్​ విస్తృత ఏర్పాట్లు చేస్తోంది. ఇప్పటికే ట్రంప్​ పయనించే మార్గంలోని రోడ్లన్నీ ఆయన​ చిత్రాలు, స్వాగత నినాదాలతో నిండిపోయాయి. పరిసర ప్రాంతాలన్నీ పరిశుభ్రంగా ఉండేలా చూస్తున్నారు. వీధులకు ఇరువైపులా ప్రత్యేక డిజైన్లు, లైట్లతో సర్వాంగ సుందరంగా ముస్తాబు చేస్తున్నారు.

ట్రంప్​ భద్రత కోసం ఎక్కడికక్కడ పటిష్టమైన వ్యవస్థను ఏర్పాటు చేశారు. ఆగ్రాలో 10 పారామిలిటరీ దళాలను మోహరించారు. నగరం మొత్తం సీసీటీవీలు అమర్చారు. ట్రంప్​ వెళ్లే మార్గంలో వేర్వేరు చోట్ల మొత్తం కలిపి 4 నుంచి 5 వేల మంది భద్రతా సిబ్బంది పహారా కాయనున్నారు.

బంగారు, వెండి పూతతో కంచాలు..

రెండు రోజుల భారత పర్యటనలో డొనాల్డ్​ ట్రంప్​ అహ్మదాబాద్​, ఆగ్రా, దిల్లీ వెళ్లనున్నారు. దిల్లీలో ట్రంప్​, మెలానియా దంపతుల విందు కోసం 'ట్రంప్​ కలెక్షన్'​ పేరుతో బంగారు, వెండి పూత పూసిన పళ్లాలు, టేబుల్​ వేర్​ సిద్ధం చేశారు. వీటిలో ప్రత్యేక వంటకాలు, పండ్లు, అల్పాహారం ఇతరత్రా సమకూర్చుతున్నారు.

జైపుర్​కు చెందిన అరుణ్​ పబువల్​ బృందం వీటిని ప్రత్యేకంగా తయారుచేసింది. అమెరికా మాజీ అధ్యక్షుడు బరాక్​ ఒబామా భారత్​కు వచ్చిన సమయంలోనూ ఇలాగే రూపొందించినట్లు చెప్పారు అరుణ్​.