ఆదాయానికి మించిన ఆస్తుల కేసులో బెంగళూరు జైలులో ఉన్న శశికళ విడుదలపై ఎట్టకేలకు స్పష్టత వచ్చింది. ఆమె 2021 జనవరి 27న విడుదలయ్యే అవకాశం ఉన్నట్లు తెలుస్తోంది. అయితే ఇందుకు ఆమె రూ. 10 కోట్ల జరిమానా చెల్లించాల్సి ఉంది.
వచ్చే ఏడాది ఫిబ్రవరి నాటికి ఆమె నాలుగేళ్ల జైలు శిక్ష ముగియనుంది. అయితే శశికళ సహా ఆమె బృందాన్ని శిక్షాకాలానికి ముందే సత్ప్రవర్తన నిబంధనల కింద.. జనవరిలో అధికారులు విడుదల చేయనున్నారు.
10 కోట్లు కట్టగలరా?
ఆమె విడుదల తేదీపై స్పష్టత వచ్చినప్పటికీ జరిమానా రూ.10 కోట్లు శశికళ కట్టగలరా అనేది ప్రశ్న. ఇప్పటికే ఆమెను పార్టీ బహిష్కరించింది. ఆస్తులు, డబ్బు కోల్పోయారు. మరి ఇలాంటి పరిస్థితుల్లో ఆమె అంత జరిమానా ఎలా కడతారు.
కోర్టు ఆదేశాలు...
జైలు నుంచి శశికళ విడుదల కావాలంటే ఆమె రూ.10 కోట్ల జరిమానా కట్టాలి. చెక్కు లేదా డిమాండ్ డ్రాఫ్ట్ రూపంలో జరిమానాను చెల్లించవచ్చు. అయితే ఇందుకు ఆదాయ పన్ను శాఖ నుంచి నిరభ్యంతర పత్రం తప్పక కావాలి. జరిమానా కట్టలేకుంటే మరో ఏడాది పాటు ఆమె జైలు శిక్ష అనుభవించాలని కోర్టు ఆదేశించింది. సుధాకరన్, ఇళవరసికి కూడా ఇవే నిబంధనలు వర్తిస్తాయి.