కరోనాపై పోరు: భారత్​కు అమెరికా ఆర్థిక సాయం

ప్రపంచానికి పెను ముప్పుగా మారిన కరోనా వైరస్‌ను ఎదుర్కొనేందుకు భారత్‌కు ఆర్థిక సాయం ప్రకటించింది అమెరికా. మొత్తం 5.9 మిలియన్ల డాలర్లను అందిస్తున్నట్లు తెలిపింది.

కరోనా మహమ్మారిని ఎదుర్కొనేందుకు భారత్‌కు ఆర్థిక సాయం ప్రకటించింది అమెరికా. యూఎస్​ అంతర్జాతీయ అభివృద్ధి సంస్థ(యూఎస్‌ఏఐడీ) ద్వారా 5.9 మిలియన్‌ డాలర్లను ఇవ్వనుంది.

కరోనా బాధితులకు చికిత్స, ఇతర సాయం అందించడం, ప్రజల్లో అవగాహన పెంచేందుకు అవసరమైన ప్రచారం చేయడం, కొత్త కేసులు కనుగొనడం, నిఘాను మరింత పటిష్ఠం చేయడం వంటి చర్యలు చేపట్టేందుకు ఈ నిధుల్ని భారత్​ ఉపయోగించాల్సి ఉంటుందని తెలిపింది అమెరికా విదేశాంగ శాఖ.

గత 20 ఏళ్లలో అమెరికా దాదాపు 2.8 బిలియన్ల డాలర్లను భారత్​కు సాయం అందించింది. ఇందులో 1.4 బిలియన్ల డాలర్లు వైద్య సాయం కింద ఇచ్చింది.

పాక్​కు ఐఎంఎఫ్​ సాయం..

కరోనా కారణంగా పాకిస్థాన్​కు అత్యవసర ఆర్థిక సాయం కింద 1.386 బిలియన్ల డాలర్లను సమకూర్చేందుకు అంతర్జాతీయ ద్రవ్య నిధి గురువారం ఆమోదం తెలిపింది.