అండర్​ వరల్డ్​ డాన్ అరెస్ట్.. భారత్​కు అప్పగింత!

బాలీవుడ్ సినీ పరిశ్రమ, కర్ణాటకలో 200కుపైగా నేరాలకు పాల్పడ్డాడని ఆరోపణలు ఎదుర్కొంటున్న అండర్​వరల్డ్​ డాన్ రవి పూజారి దక్షిణాఫ్రికాలో అరెస్టయ్యాడు. కర్ణాటకకు చెందిన ప్రత్యేక పోలీస్ బృందం సోమవారం తెల్లవారుజామున అతడిని భారత్​కు తీసుకురానుంది. దేశంలోని ప్రధాన దర్యాప్తు సంస్థలైన ఎన్​ఐఏ, సీబీఐ, రా విభాగాలు రవి పూజారిని విచారించనున్నట్లు సమాచారం.

పరారీలో ఉన్న గ్యాంగ్​స్టర్ రవిపూజారి దక్షిణాఫ్రికాలో అరెస్టయ్యాడు. అతడిని కర్ణాటకకు చెందిన సీనియర్ ఐపీఎస్ అధికారి నేతృత్వంలో సోమవారం తెల్లవారుజామున భారత్​కు తీసుకువస్తున్నట్లు సమాచారం.

బాలీవుడ్​ సినీ పరిశ్రమ, కర్ణాటకలో హత్యలు, బెదిరింపు వంటి 200కు పైగా కేసుల్లో నిందితుడైన రవి గత 15 ఏళ్లుగా పరారీలో ఉన్నాడు. కొన్నేళ్ల క్రితం సెనెగల్​ పోలీసులకు పట్టుబడిన పూజారికి గతేడాది అక్కడి కోర్టు బెయిల్​ మంజూరు చేసింది. బెయిల్ నిబంధనలను అతిక్రమించిన అతడు దక్షిణాఫ్రికాకు పరారయ్యాడని తెలుస్తోంది.

ఈ నేపథ్యంలో సెనెగల్, దక్షిణాఫ్రికా పోలీసులు సంయుక్తంగా చేపట్టిన ఆపరేషన్​లో భద్రతా సిబ్బందికి చిక్కాడు రవి పూజారి. అతడ్ని సెనెగల్​కు తరలించి.. అధికారికంగా భారత అధికారులకు అప్పగించారు.

ఇదీ నేపథ్యం!

90వ దశకంలో అండర్​వరల్డ్​ డాన్​గా వెలుగొందాడు రవి పూజారి. గ్యాంగ్​స్టర్ ఛోటా రాజన్​ బృందంలో తొలుత పనిచేసిన పూజారి అనంతరకాలంలో దావుద్ ఇబ్రహీంకు దగ్గరయినట్లు తెలుస్తోంది.

పూజారిపై మంగళూరు పోలీస్​ స్టేషన్​లో 26, బెంగళూరులో 29 కేసులు ఉన్నాయి. ప్రస్తుతం బెంగళూరు, మంగళూరు ప్రాంతాల్లో స్థిరాస్తి​ వ్యవహారాలను చక్కబెడుతున్నట్లు సమాచారం. రవి పూజారిని వెనక్కి తీసుకొచ్చిన అనంతరం ఎన్​ఐఏ, సీబీఐ, భారత నిఘా సంస్థ-రా సిబ్బంది విచారించనున్నట్లు తెలుస్తోంది.

ఇదీ చూడండి:ట్రంప్​ కోసం 'పోలీస్​ అమ్మ' డ్యూటీ- పసి బిడ్డతో కలిసి...