బీపీ నిర్ధరణ విషయంలో జరిగే లోటుపాట్లు తొలగాలంటే రోగికి కనీసం 3సార్లు రక్తపోటు పరీక్షించాలని తాజా అధ్యయనం చెప్తోంది. భారత ప్రజారోగ్య సంస్థ, భారత గణాంకాల సంస్థ ఆర్థిక, ప్రణాళిక విభాగం రక్తపోటుపై సంయుక్తంగా పరిశోధనలు చేశాయి. ఈ వివరాలతో ఎయిమ్స్ ఆధ్వర్యంలోని జర్నల్ ఆప్ హ్యూమన్ హైపర్టెన్షన్లో కథనం ప్రచురితమైంది.
అవసరం లేకున్నా చికిత్స...
సరైన అవగాహన లేకనో... రోగుల సంఖ్య అధికంగా ఉండి ఒత్తిడి వల్లనో... సాధారణంగా రక్తపోటు నిర్ధరణకు ఒకే ఒక్క పరీక్షను ప్రామాణికంగా తీసుకుంటున్నారు వైద్యులు. తద్వారా చాలా మందికి అధిక రక్తపోటు ఉందని నిర్ధరిస్తున్నారు. కొందరికి అవసరం లేకున్నా చికిత్స అందిస్తున్నారు.
"భారతదేశంలో చాలా మంది వైద్యులు సమయాభావం వల్ల ఒక బీపీ కొలతపైనే ఆధారపడుతున్నారు. అయితే రక్తపోటు శ్వాసక్రియ, భావోద్వేగం, వ్యాయామం, భోజనం, పొగాకు, మద్యం, పరిసరాల ఉష్ణోగ్రత, మూత్రాశయ వ్యాకోచం, నొప్పి తదితర అంశాల ప్రభావంతో క్షణక్షణం బీపీ మారుతుంటుంది. అందువల్ల వైద్యులు మూడుసార్లు బీపీ కొలిచేలా ప్రోత్సహించాల్సిన అవసరం ఉంది. ముఖ్యంగా అధిక రక్తపోటు ఉన్న రోగుల విషయంలో."
-డాక్టర్ అంబుజ్ రాయ్, ప్రొఫెసర్, కార్డియాలజీ విభాగం, ఎయిమ్స్