సిద్ధార్థతో చట్టప్రకారమే నడుచుకున్నాం: ఐటీ శాఖ

కెఫే కాఫీ డే వ్యవస్థాపకుడు సిద్ధార్థకు సంబంధించి చట్ట ప్రకారమే నడుచుకున్నామని ఆదాయపు పన్ను శాఖ అధికారులు స్పష్టంచేశారు. అదృశ్యం తర్వాత దొరికిన లేఖలో ఐటీ అధికారుల వేధింపులపై సిద్ధార్థ ప్రస్తావించారు.

కర్ణాటక మాజీ ముఖ్యమంత్రి, కెఫే కాఫీ డే వ్యవస్థాపకుడు సిద్ధార్థ అదృశ్యంపై ఆదాయపు పన్ను శాఖ స్పందించింది. అదృశ్యం తర్వాత దొరికిన లేఖలో ఐటీ అధికారుల వేధింపులపై సిద్ధార్థ ప్రస్తావించారు. ఈ నేపథ్యంలో చట్ట ప్రకారమే దర్యాప్తు చేశామని అధికార వర్గాలు తెలిపాయి.

"సిద్ధార్థ విషయంలో చట్ట ప్రకారమే దర్యాప్తు చేశాం. ఐటీ చట్టం నిబంధనల ప్రకారమే శాఖ చర్యలు తీసుకుంటుంది. మైండ్​ట్రీ షేర్ల నుంచి రూ.3,200 కోట్లు పొందారు. అందుకు చెల్లించాల్సిన పన్ను రూ.300 కోట్లకు బదులు రూ.46 కోట్లు చెల్లించారు. ఇంకో విషయమేమిటంటే సామాజిక మాధ్యమాల్లో వైరల్​ అయిన సిద్ధార్థ లేఖలో ఉన్న సంతకం గత రికార్డులతో సరిపోలట్లేదు."

- ఐటీ అధికారి

షేర్లు కుదేలు

సిద్ధార్థ అదృశ్యంతో కాఫీ డే ఎంటర్​ప్రైజెస్​ లిమిటెడ్​ షేర్లు భారీగా నష్టపోయాయి. సెన్సెక్స్​లో 19.99 శాతం, నిఫ్టీలో 20 శాతం మేర నష్టం వాటిల్లి 52 వారాల కనిష్ఠ స్థాయికి చేరుకుంది. కంపెనీ మార్కెట్​ విలువ రూ.812.68 కోట్లకు పడిపోయింది.

సోమవారం బెంగళూరు నుంచి సకలేశ్​పుర్ బయలుదేరిన వీజీ సిద్ధార్థ కాసేపటి తర్వాత మంగళూరు వైపు వెళ్లాలని వాహన డ్రైవర్​కు సూచించారు. అనంతరం నేత్రానది వంతెనపై దిగిన సిద్ధార్థ.. నడుచుకుంటూ వెళ్లి అదృశ్యమయ్యారు. ఇంతవరకూ ఆయన ఆచూకీ దొరకలేదు.

ఇదీ చూడండి: కాఫీడే సిద్ధార్థ అదృశ్యం- ఆర్థిక ఇబ్బందులే కారణం!