వీవీఐపీ హెలీకాఫ్టర్ల స్కామ్లో నిందితుడైన గౌతమ్ ఖైతాన్.. నల్లధన చట్టం-2016కు సంబంధించి చేసిన అప్పీల్పై సుప్రీంకోర్టు తీవ్ర ఆగ్రహం వ్యక్తం చేసింది. తమ స్పందనకు మరో నాలుగు వారాలు గడువు కావాలని ఖైతాన్ తరఫు న్యాయవాది కోరినందున.. కేసు విచారణలో జాప్యం చేస్తూ ధర్మాసనాన్ని పక్కనపెట్టాలని చూస్తున్నారని మండిపడింది. సెప్టెంబర్ 18న వాదనలు వింటామని.. 17లోగా తమ స్పందన తెలియజేయాలని స్పష్టం చేసింది. న్యాయాన్ని ఈ విధంగా కొనలేమని, ఆలస్యం చేయలేమని తెలిపింది. న్యాయవాద వృత్తిలో ఉన్న మీరు చట్టాన్ని రక్షించాలని ఖైతాన్ తరఫు లాయర్కు హితవు పలికింది.
" మీ ప్రయత్నం ఏమిటి, అది మాకు అర్థమైంది. మేం అందుకు విముఖంగా ఉన్నాం. మాట్లాడకండి. మేం ఎంతో ఆగ్రహంతో ఉన్నాం. ఇది సరైన మార్గం కాదు. ధర్మాసనాన్ని పక్కనపెట్టాలని చూస్తున్నారు. న్యాయం ఈ విధంగా ఆలస్యం కాకూడదు."
- సుప్రీంకోర్టు
దిల్లీ హైకోర్టు తీర్పుపై స్టే...
2016లో అమలులోకి వచ్చిన 'నల్లధన చట్టం'.. 2015 జులై 1 నుంచి ఎలా వర్తిస్తుందన్న ఖైతాన్ వ్యాజ్యంపై సుప్రీంకోర్టు నేడు విచారణ జరిపింది. నల్లధన చట్టం-2016.. గతేడాది జులై కేసులకు వర్తించదని ఈ ఏడాది మేలో దిల్లీ హైకోర్టు తీర్పునిచ్చింది. దిల్లీ హైకోర్టు తీర్పును సవాలు చేస్తూ కేంద్రం సుప్రీం కోర్టును ఆశ్రయించింది. దిల్లీ హైకోర్టు తీర్పుపై స్టే విధించింది సుప్రీం.. కేంద్ర ప్రభుత్వం వ్యాజ్యాన్ని విచారణకు స్వీకరించింది. అయితే విచారణలో ఖైతాన్ తరఫు న్యాయవాది చేస్తున్న జాప్యానికి అత్యున్నత న్యాయస్థానం మండిపడింది. మీరు కోర్టును ఆశ్రయిస్తున్న పద్ధతి సరైంది కాదని తెలిపింది.