'కేజీఎఫ్​' హీరో హత్యకు కుట్ర పన్నిన రౌడీ ఎన్​కౌంటర్​

'కేజీఎఫ్' సినిమా హీరో యశ్​​ను హత్యచేసేందుకు కుట్ర పన్నిన నిందితుడిని పోలీసులు ఎన్​కౌంటర్ చేశారు. నేర చరిత్ర కలిగిన ఈ రౌడీ గతేడాది హీరోను హత్య చేసేందుకు ప్రయత్నించి పోలీసులకు చిక్కాడు. ఇప్పుడు పోలీసులపైనే కాల్పులకు ప్రయత్నించి హతమయ్యాడు.

నేర చరిత్ర కలిగిన స్లమ్​ భరత్​ అనే రౌడీ షీటర్​ను బెంగళూరు పోలీసులు ఎన్​కౌంటర్​ చేశారు. కన్నడ హీరో యశ్​​ను గతేడాది హత్య చేయడానికి ప్రయత్నించిన ముఠాలో స్లమ్ భరత్ ప్రధాన నిందితుడు.

రాక్​స్టార్​పై హత్యాయత్నం

గతేడాది మార్చి 7న స్లమ్​ భరత్ అతని అనుచరులు నితేశ్, నిత్యానంద, మధు, పృథ్వీ.. కేజీఎఫ్​ హీరో యశ్​ను హత్య చేసేందుకు కుట్ర పన్నారు. అయితే వారి పథకాన్ని ముందుగా తెలుసుకున్న పోలీసులు వారిని అరెస్టు చేశారు. తరువాత భరత్​ బెయిల్​పై బయటకొచ్చాడు.

కరుడుగట్టిన నేర చరితుడు

పలు క్రిమినల్ కేసుల్లో ప్రధాన నిందితుడుగా ఉన్న స్లమ్​ భరత్​ను రెండు రోజుల క్రితం ఉత్తరప్రదేశ్​లో అరెస్టు చేసి కర్ణాటకకు తీసుకొచ్చారు. పోలీసుల కథనం ప్రకారం, క్రైమ్ రీ కన్ష్​స్ట్రక్షన్​లో భాగంగా నిందితుడిని తను నేరాలు చేసిన ప్రదేశాలకు తీసుకెళ్లారు. అయితే భరత్​ పోలీసులపై దాడికి పాల్పడ్డాడు. తన దగ్గర ఉన్న అక్రమ ఆయుధంతో పోలీసులపై కాల్పులు జరిపాడు.

భరత్ పేల్చిన ఓ బుల్లెట్ నేరుగా పోలీసు ఇన్​స్పెక్టర్​కు తగిలింది. అయితే బుల్లెట్ ప్రూఫ్ జాకెట్ ధరించడం మూలంగా ఆయన తప్పించుకోగలిగారు. ​మరో బుల్లెట్ పోలీసు వాహనానికి తగిలింది. తరువాత భరత్ తన అనుచరులతో కలిసి కారులో పారిపోయాడు. వెంటనే అప్రమత్తమైన పోలీసు బృందాలు నిందితులను వెంబడించాయి.

హేసరఘట్ట వద్ద పోలీసులు నిందితుడిని అడ్డగించడానికి ప్రయత్నించారు. అయితే భరత్​ మరోసారి కాల్పులకు తెగబడ్డాడు. తప్పనిసరి పరిస్థితుల్లో పోలీసులు ఎదురుకాల్పులు జరిపారు. ఫలితంగా ఓ బుల్లెట్​ భరత్​ పొత్తికడుపులోకి, మరో బుల్లెట్ అతని కాలిలోకి దూసుకుపోయాయి.

తీవ్రంగా గాయపడిన స్లమ్​ భరత్​ను పోలీసులు సప్తగిరి ఆసుపత్రికి తీసుకెళ్లారు. అక్కడ నుంచి మెరుగైన చికిత్స కోసం విక్టోరియా హాస్పిటల్​కి తరలిస్తుండగా మార్గమధ్యంలో భరత్ ప్రాణాలు కోల్పోయాడు.

స్లమ్ భరత్​పై హత్య, హత్యాయత్నం సహా 50కిపైగా క్రిమినల్​ కేసులు ఉన్నాయని పోలీసులు తెలిపారు.

ఇదీ చదవండి:అమెరికా మతస్వేచ్ఛ కమిషన్ వ్యాఖ్యలను ఖండించిన కేంద్రం