కన్నడ అసెంబ్లీలో నేడు బలపరీక్ష.. జరిగే అవకాశాలపై అనిశ్చితి నెలకొంది. రెండు రోజుల అనంతరం... ప్రారంభమైన అసెంబ్లీలో ముఖ్యమంత్రి బలనిరూపణ జరుగుతుందని అంతా అనుకున్న తరుణంలో స్పీకర్ కీలక నిర్ణయం తీసుకున్నారు.
రాజీనామాలు చేసిన రెబల్స్ ఎమ్మెల్యేలకు నోటీసులు పంపించారు సభాపతి రమేశ్ కుమార్. మంగళవారం ఉదయం 11 గంటలకు తన కార్యాలయంలో కలవాల్సిందిగా ఆదేశించారు. సంకీర్ణ కూటమి నేతల ఫిర్యాదు మేరకు ఈ నిర్ణయం తీసుకున్నారు స్పీకర్.
సుప్రీంలో చుక్కెదురు...
మరోవైపు.. సుప్రీంకోర్టును ఆశ్రయించిన స్వతంత్ర ఎమ్మెల్యేలిద్దరికీ చుక్కెదురైంది. కన్నడ అసెంబ్లీలో ఇవాళే.. ముఖ్యమంత్రి బలనిరూపణ చేసుకునేలా ఆదేశించాలని అత్యున్నత న్యాయస్థానంలో పిటిషన్ దాఖలు చేశారు స్వతంత్ర శాసనసభ్యులు శంకర్, నగేశ్. తమ పిటిషన్లపై త్వరగా విచారణ చేపట్టాలన్న విజ్ఞప్తిని తోసిపుచ్చారు ప్రధాన న్యాయమూర్తి రంజన్ గొగొయి. రేపు విచారణ జరుపుతామని స్పష్టం చేశారు.
బలనిరూపణపై అనుమానాలు...
ఇప్పటికే.. విప్పై స్పష్టత అంశంలో సుప్రీంకోర్టులో వేర్వేరుగా పిటిషన్లు దాఖలు చేశారు కర్ణాటక ముఖ్యమంత్రి కుమారస్వామి, రాష్ట్ర కాంగ్రెస్ అధ్యక్షుడు దినేశ్ గుండూరావు. వీటన్నింటిపై అత్యున్నత న్యాయస్థానం.. రేపే విచారణ చేపట్టే అవకాశముంది. ఈ పరిణామాల నేపథ్యంలో నేడు బలపరీక్ష జరగదనే అనుమానాలు వ్యక్తమవుతున్నాయి. సంకీర్ణ కూటమి కూడా విశ్వాస పరీక్షపై చర్చను సాగదీసే యోచనలో ఉన్నట్లు తెలుస్తోంది.