"కార్తీకి టికెట్ ఇస్తే కాంగ్రెస్​కే నష్టం"

తమిళనాడులోని శివగంగ లోక్​సభ స్థానానికి అభ్యర్థిగా కార్తీ చిదంబరాన్ని ఖరారు చేయడంపై కాంగ్రెస్​ సీనియర్​ నేత, కేంద్ర మాజీ మంత్రి సుదర్శన నచియప్పన్​ అసంతృప్తి వ్యక్తం చేశారు. అధిష్ఠానం నిర్ణయం వల్ల తమిళనాడులో పార్టీ నష్ట పోతుందని అభిప్రాయపడ్డారు.

కాంగ్రెస్ సీనియర్​ నేత, కేంద్ర మాజీ మంత్రి పి.చిదంబరం కుమారుడు కార్తీ చిదంబరాన్ని తమిళనాడులోని శివగంగ లోక్​సభ స్థానానికి అభ్యర్థిగా ప్రకటించడంపై స్థానిక సీనియర్​ నేతలు అసంతృప్తి వ్యక్తం చేస్తున్నారు. కాంగ్రెస్ అధిష్ఠానం నిర్ణయాన్ని కేంద్ర మాజీ మంత్రి ఈ.ఎం.సుదర్శన నచియప్పన్​ తీవ్రంగా వ్యతిరేకిస్తున్నారు. చిదంబరం కుటుంబాన్ని తమిళ ప్రజలు ఇష్టపడడం లేదని తెలిపారు. దీని వల్ల పార్టీకి తమిళనాడులో తప్పకుండా నష్టం జరుగుతుందన్నారు.

శివగంగ లోక్​సభ స్థానం నుంచిపి.చిదంబరం 1984నుంచి ఏడుసార్లు గెలుపొందారు.

చిదంబరం కుటుంబం తమిళనాడు ప్రజలకు చేసిందేమి లేదని ఆరోపించారు నచియప్పన్. యూపీఏ అధికారంలో ఉన్నపుడు కేంద్రమంత్రిగా ఉన్న పి. చిదంబరం.... తనను పార్టీలో ఎదగనీయకుండా అడ్డుకున్నారని విమర్శించారు.

ఐఎన్​ఎక్స్​ మీడియా కేసులో కార్తీ చిదంబరాన్ని ఎన్​ఫోర్స్​మెంట్​ డైరెక్టరేట్ విచారిస్తోంది. ఈ కేసుకు సంబంధించి కార్తీకి చెందిన రూ.54కోట్ల విలువ చేసే ఆస్తులను ఈడీ జప్తు చేసింది.

ఇదీ చూడండి..కర్ణాటక సంకీర్ణ రాజకీయాల్లో ఊహించని మలుపు