రోడ్డు ప్రయాణ సాధనాలు, తక్కువ ధరకు సేవలు అందిస్తున్న విమానయాన సంస్థల నుంచి పోటీని ఎదుర్కొనే దిశగా అడుగులు వేస్తోంది రైల్వేశాఖ. తక్కువ ఆదాయాన్ని ఆర్జిస్తున్న శతాబ్ది, తేజస్, గతిమాన్ వంటి హైస్పీడ్ రైళ్ల టికెట్లను 25 శాతం తగ్గింపుతో అందించేందుకు యోచిస్తోందని రైల్వే శాఖకు చెందిన ఓ ఉన్నతాధికారి వెల్లడించారు.
ఏసీ ఛైర్ కార్, ఎగ్జిక్యూటివ్ ఛైర్ కార్ల సీట్ల ధరల ఆధారంగా ఈ డిస్కౌంట్ను నిర్ణయించనుంది. టికెట్ ధరతో అదనంగా జీఎస్టీ, రిజర్వేషన్ ఛార్జీలు, సూపర్ ఫాస్ట్ సుంకం వీటికి అదనం.
"గతేడాది నెలవారీ ఆదాయం 50 శాతానికి తగ్గిన రైలు సర్వీసుల్లో ఈ టికెట్ డిస్కౌంట్ వర్తింపజేస్తాం."
-రైల్వే అధికారి
ఈ విధంగా ఆదాయం తగ్గిందని గుర్తించిన రైళ్లలో డిస్కౌంట్ను ఆయా జోన్ల ప్రిన్సిపల్ కమర్షియల్ మేనేజర్లు నిర్ణయిస్తారని స్పష్టం చేసింది. డిస్కౌంట్ను నిర్ణయించేటప్పుడు పోటీ రవాణా సాధనాల ధరను కూడా పరిగణనలోకి తీసుకుంటామని రైల్వే వర్గాలు వెల్లడించాయి.
వివిధ విభాగాలుగా...
ఏడాదికి ఒకసారి, ఆరు నెలలు, సీజన్, వారాంతాల్లో ఈ డిస్కౌంట్ కల్పించవచ్చని పేర్కొన్నారు రైల్వే శాఖ ఉన్నతాధికారి. తాజా రాయితీ అందించే రైళ్లలో గ్రేడెడ్ డిస్కౌంట్, ఫ్లెక్సీ-ఫేర్ వంటి పథకాలు వర్తించవని తెలిపారు. సెప్టెంబర్ 30లోగా తక్కువ ఆదాయం ఉన్న హైస్పీడ్ రైళ్లను గుర్తించి... ఈ విషయమై ముందుకెళ్లనున్నట్లు తెలిపారు. ఆదాయాన్ని పెంచేందుకు ఆయా జోన్లు సమర్థంగా పనిచేయాల్సుంటుందన్నారు.
డిస్కౌంట్లు అమలు చేసిన నాలుగు నెలల అనంతరం... రైల్వే జోన్లు ఫలితాల నివేదికను అందించాలని కోరనున్నట్లు ఆ అధికారి తెలిపారు.
ఇదీ చూడండి: మంటగలుస్తున్న మానవత్వం...!
