జమ్ముకశ్మీర్లో క్రమంగా పరిస్థితులు అదుపులోకి వస్తున్న నేపథ్యంలో లోయలో పాక్షికంగా ఆంక్షలు సడలించారు. 2జీ ఇంటర్నెట్ సేవలను పునరుద్ధరించారు. శ్రీనగర్లోని చాలా ప్రాంతాల్లో సమాచార సేవలు అందుబాటులోకి వచ్చాయని అధికారులు తెలిపారు.
కశ్మీర్లో భద్రతా బలగాల గస్తీ యథావిధిగా కొనసాగుతుండగా... జనసంచారంపై మాత్రమే ఆంక్షలు సడలించారు. ప్రభుత్వ ఉద్యోగులు విధులకు హాజరయ్యేందుకు వీలుగా ఈ నిర్ణయం తీసుకున్నట్లు అధికారులు తెలిపారు.
12 జిల్లాలు ప్రశాంతం
జమ్ముకశ్మీర్లోని 12 జిల్లాల్లో చాలా వరకూ సాధారణ పరిస్థితులు నెలకొన్నాయని, 5 జిల్లాల్లో మాత్రమే పరిమిత స్థాయిలో ఆంక్షలు కొనసాగిస్తున్నట్లు ప్రకటించారు. సివిల్ లైన్స్, ఇతర జిల్లా కేంద్రాల్లో ప్రైవేటు వాహనాలు నడుస్తున్నాయి. కొన్ని దుకాణాలు ఉదయం తెరిచినా ప్రధాన వాణిజ్య సముదాయాలు, పెట్రోల్ బంకులు మూతపడే ఉన్నాయి.
మరింత ఉపశమనం
తాజా నిర్ణయంలో 35 పోలీస్ స్టేషన్ల పరిధిలోని ప్రాంతాల్లో ఆంక్షలను సడలించారు. రాష్ట్రంలో మొత్తం 96 టెలిఫోన్ ఎక్స్ఛేంజీల్లో 17 పని చేస్తున్నాయి. మరో 20 ఎక్స్ఛేంజీలు త్వరలోనే అందుబాటులోకి వస్తాయని సమాచారం. శ్రీనగర్లో సివిల్ లైన్స్, కంటోన్మెంట్, విమానాశ్రయం, రాజ్ బాఘ్, జవహార్ నగర్లో 50 వేల ల్యాండ్ ఫోన్లు పని చేస్తున్నాయి.
ఇదీ చూడండి: భూటాన్లో మోదీకి అడుగడుగునా బ్రహ్మరథం