'రాహుల్ వ్యాఖ్యల ఆధారంగానే పాక్ ఫిర్యాదు'

కశ్మీర్​ పరిస్థితులపై కాంగ్రెస్​ నేత రాహుల్​గాంధీ చేసిన వ్యాఖ్యలకు కేంద్రమంత్రి, భాజపా సీనియర్ నేత ప్రకాశ్ జావడేకర్ ఆగ్రహం వ్యక్తం చేశారు. రాహుల్ వ్యాఖ్యల ఆధారంగానే పాకిస్థాన్ ఐక్యరాజ్యసమితిలో ఫిర్యాదు చేసిందన్నారు. రాహుల్​ బాధ్యతారాహిత్యంగా ప్రవర్తించారని ఆరోపించారు.

కశ్మీర్​లో పరిస్థితి హింసాత్మకంగా మారిందన్న కాంగ్రెస్ నేత రాహుల్ గాంధీ వ్యాఖ్యలకు దీటుగా బదులిచ్చారు కేంద్రమంత్రి ప్రకాశ్​ జావడేకర్. రాహుల్ చేసిన బాధ్యతారాహిత్య వ్యాఖ్యలు పాకిస్థాన్​కు ఆయుధంగా మారాయన్నారు. ఆయన చేసిన వ్యాఖ్యలకు బేషరతుగా క్షమాపణలు చెప్పాలని డిమాండ్ చేశారు.

"రాహుల్ గాంధీ ఒక ప్రకటన చేశారు... కశ్మీర్​లో పరిస్థితులు సాధారణంగా లేవని. ఈ సమాచారం ఎక్కడి నుంచి వచ్చింది... రాహుల్ గాంధీ మీరు చెప్తున్నది చాలా తప్పు. కశ్మీర్​లో ప్రతికూల వాతావరణం లేదు... హింస చెలరేగడం లేదు. కానీ రాహుల్ వ్యాఖ్యలు పాక్​లో విశేష ప్రాచుర్యం పొందాయి. రాహుల్ వ్యాఖ్యల ఆధారంగానే కశ్మీర్​లో హింసాత్మక వాతావరణం నెలకొందని పాకిస్థాన్ ఐరాసలో ఫిర్యాదు చేసింది. రాహుల్ గాంధీ ప్రకటన దేశం సిగ్గుపడేలా చేసింది. కశ్మీర్​లోని వాస్తవిక పరిస్థితులపై ఆయన వ్యాఖ్యానించలేదు. పాక్ చేతుల్లో ఆయుధంగా మారారు."

-ప్రకాశ్ జావడేకర్, కేంద్రమంత్రి

370 అధికరణ రద్దు అనంతరం కశ్మీర్​లో పరిస్థితులపై రాహుల్ గాంధీ పలు ఆరోపణలు చేశారు. కశ్మీర్​లో పర్యటించేందుకు రాష్ట్ర ప్రభుత్వం నిరాకరించడంపైనా విమర్శలు గుప్పించారు. అయితే కశ్మీర్​పై ఐరాసలో పాకిస్థాన్​ ఫిర్యాదు చేసింది. ఇందులో రాహుల్​ వ్యాఖ్యలను ఉటంకించింది దాయాది దేశం. ఇది రాహుల్​పై రాజకీయ దుమారానికి తెర లేపింది.

కశ్మీర్ అంశం తమ అంతర్గత వ్యవహారమని.. పాక్​కు ఎలాంటి సంబంధం లేదని నేడు రాహుల్​ ట్వీట్​ చేశారు.

ఇదీ చూడండి: ప్లాస్టిక్​ భూతం: ఆవు కడుపులో 45 కిలోల పాలిథీన్​