కీలక రాష్ట్రమైన ఉత్తర్ప్రదేశ్ నుంచి కాంగ్రెస్ పార్టీ ప్రధాన కార్యదర్శి ప్రియాంకా గాంధీ సార్వత్రిక ఎన్నికల ప్రచారాన్ని మొదలుపెట్టనున్నారు. ఈ నెల 18వ తేదీ నుంచి రాష్ట్రంలో ఆమె ప్రచారం చేయనున్నారు. గంగానదీ తీరాన ఉన్న తూర్పు ఉత్తర్ప్రదేశ్, ప్రయాగ్రాజ్, వారణాసిల గుండా ఈ ప్రచార కార్యక్రమం సాగనుంది. అయితే ఇది పాదయాత్ర కాదు, బస్సు యాత్ర కాదు.. బోటు యాత్ర.
నేడు ప్రారంభం కావాలి కానీ..
షెడ్యూల్ ప్రకారం నేటి నుంచే ప్రచార కార్యక్రమం జరగాల్సి ఉండగా, కొన్ని కారణాల వల్ల ఇది 18వ తేదీకి వాయిదా పడిందని కాంగ్రెస్ ప్రకటించింది.
ప్రయాగ్రాజ్ నుంచి వారణాసి వరకు పర్యటించేందుకు 18 నుంచి 20వ తేదీవరకు కాంగ్రెస్కు అనుమతి లభించినట్లు ఎన్నికల సంఘానికి సమర్పించిన లేఖలో ఉంది.
భారీ బోటు యాత్ర
సుమారు బోటులో 100 కిలోమీటర్ల దూరం ప్రయాణించనున్నారు ప్రియాంక. ప్రతి రేవులోనూ ఆమెకు ఘనంగా స్వాగతం పలికేందుకు ఏర్పాట్లు చేస్తున్నారు కాంగ్రెస్ నాయకులు. మారుమూల నదీ తీర ప్రాంతంలోని ప్రజల సమస్యలు వినేందుకే ప్రియాంక గాంధీ ఈ మార్గాన్ని ఎంచుకున్నట్లు హస్తం పార్టీ పేర్కొంది.
స్వతంత్ర భారత మొదటి ప్రధాని జనహర్లాల్ నెహ్రూ జన్మించిన ప్రయాగ్రాజ్ నుంచి ప్రియాంక ప్రచారం ప్రారంభించనున్నారు.
ఆనంద్ భవన్ సందర్శనతో ప్రారంభం
అలహాబాద్లోని చారిత్రక కట్టడం ఆనంద్ భవన్ను సందర్శించనున్నారు ప్రియాంకా గాంధీ. ఇక్కడ జవహర్ లాల్ నెహ్రూ, ఆయన తండ్రి మోతీలాల్ నెహ్రు నివాసముండే వారు. ప్రస్తుతం ఇది మ్యూజియంగా ఉంది.
ఆలయాల్లో పూజలు
పర్యటనలో భాగంగా వారణాసిలోని కాశీ విశ్వనాథ్ ఆలయం, మీర్జాపూర్లోని వింద్యావాసినీ ఆలయాలను దర్శించనున్నారు ప్రియాంకా గాంధీ. ప్రత్యేక పూజలు నిర్వహించనున్నారు.
