బెంగళూరు సెంట్రల్‌నుంచి స్వతంత్ర అభ్యర్థిగా పోటీ చేస్తున్న సినీ నటుడు ప్రకాశ్ రాజ్ ఆమ్ఆద్మీ పార్టీకి తన సంపూర్ణ మద్దతు ప్రకటించారు. దిల్లీలో వారం రోజుల పాటు ఆప్ తరఫున ప్రచారం చేసేందుకు ప్రణాళికలు సిద్ధం చేసుకుంటున్నట్లు ఆయన తెలిపారు. మతపరమైన, ద్వేషపూరిత రాజకీయాలకు స్వస్తి పలికేందుకు.. ప్రజలందరూ తమతో కలిసి రావాలని ప్రకాశ్ రాజ్ పిలుపునిచ్చారు.
ఆప్‌లో తాను లేకపోయినా ఆ పార్టీ సిద్ధాంతాలు మాత్రం తనకు బాగా నచ్చాయన్నారు. దేశంలో ఏ పార్టీ అయినా పాలించడానికి కాకుండా ప్రజలకు సేవ చేసేందుకు అధికారంలోకి రావాలని ఆకాంక్షించారు. ఇతర పార్టీలతో పోలిస్తే ఆప్ మార్పు కోసం చిత్తశుద్ధితో పని చేస్తోందని అందుకే ఆ పార్టీ అభ్యర్థుల తరపున ప్రచారం చేస్తానని తెలిపారు.
ఈ పార్టీ (ఆమ్ ఆద్మీ) నాకు చాలా నచ్చింది. సామాన్యులకు మెరుగైన ఆరోగ్యం, విద్య అందించేందుకు ఆప్ ఎన్నికల్లో పోరాడుతోంది. పార్టీ సిద్ధాంతాలు నాకు నచ్చాయి. దిల్లీలో, దేశంలో మార్పు కోసం చిత్తశుద్ధితో పని చేస్తోంది. ప్రస్తుతం మతపరమైన, ద్వేషపూరిత రాజకీయాలు, ప్రసంగాలు నడుస్తున్నాయి. వీరి మధ్య ఆప్ లాంటి పార్టీ ఒక మంచి వినసొంపైన పాటలాంటిది. ఈ దేశ పౌరుడిగా ఇలాంటి వారికి మద్దతు పలకడం నా బాధ్యత.
- ప్రకాశ్ రాజ్, సినీ నటుడు
