గుజరాత్ రాష్ట్రానికి జీవనాధారంగా పిలుచుకునే సర్దార్ సరోవర్ డ్యామ్ ఈ నెల 17న గరిష్ఠ నీటిమట్టానికి చేరుకోనుంది. ప్రస్తుత నీటిమట్టం 138.68 మీటర్లకు చేరుకుందని రాష్ట్ర ముఖ్యమంత్రి విజయ్ రూపానీ తెలిపారు. మరో 68 సె.మీ చేరుకుంటే పూర్తి స్థాయి నీటిమట్టం మార్క్ను అందుకుంటుంది.
ఈ సందర్భంగా జలాశయాన్ని ప్రధాని నరేంద్ర మోదీ మంగళవారంసందర్శిస్తారని ముఖ్యమంత్రి తెలిపారు. అయితే ఆరోజు మోదీ పుట్టినరోజు కావడం మరో విశేషం.
"ఎన్నో ఏళ్ల కృషి తర్వాత నర్మదా నది పైన సర్దార్ వల్లభాయి పటేల్ డ్యామ్ నిర్మాణం కల సాకారమైంది.జలాశయాన్ని నిండుకుండలా చూడాలని రాష్ట్ర ప్రజలందరూ కోరుకున్నారు.అది త్వరలోనే నెరవేరనుంది." -విజయ్ రూపానీ,గుజరాత్ సీఎం
1961 ఏప్రిల్ 5న దేశ తొలి ప్రధాని జవహర్లాల్ నెహ్రూ చేతులమీదుగా ఈ డ్యామ్కు పునాది రాయి పడింది. అయితే ఇది పూర్తయ్యేసరికి 56 ఏళ్లు పట్టింది. గుజరాత్, మధ్యప్రదేశ్ రాష్ట్రాల మధ్య నర్మదా నది నీరు, విద్యుత్ పంపకాలపై ఎన్నో ఏళ్లు వివాదం నడిచింది. ఎట్టకేలకు 2017లో ఈ ఆనకట్ట నిర్మాణం పూర్తయింది. ప్రధాని మోదీ ఈ డ్యామ్ను జాతికి అంకితం చేశారు.
131 పట్టణ కేంద్రాలు, 9,633 గ్రామాలకు ఈ ఆనకట్ట ద్వారా నీరు అందించడమే లక్ష్యంగా పెట్టుకుంది గుజరాత్ సర్కారు. అలాగే 15 జిల్లాల్లోని వ్యవసాయ క్షేత్రాలకు నీరు అందించేందుకు ప్రయత్నాలు చేస్తున్నారు.