రైతులపై కేసులు ఉపసంహరించుకుంటాం: పెప్సికో

గుజరాత్​ బంగాళదుంపల రైతులపై పెట్టిన కేసులు వెనక్కి తీసుకునేందుకు అంగీకరించింది ఆహార, శీతల పానీయాల తయారీ సంస్థ పెప్సికో. ఇది రైతుల ఘనవిజమని కర్షక సంఘాలు హర్షం వ్యక్తం చేశాయి.

గుజరాత్​లో బంగాళదుంప సాగు చేసిన రైతులపై పెట్టిన కేసులను వెనక్కి తీసుకుంటున్నట్లు ఆహార, శీతల పానీయాల దిగ్గజ సంస్థ పెప్సికో ఇండియా తెలిపింది. అయితే ఈ నిర్ణయాన్ని పెప్సికో ఇంకా న్యాయస్థానాలకు తెలియజేయలేదని రైతుల తరఫు న్యాయవాది ఆనంద్​ యాగ్నిక్​ తెలిపారు.

'లేస్​ చిప్స్​' కోసం 'ఎఫ్​-సీ' రకం బంగాళదుంపపై పెప్సికో సంస్థ 'మేథో హక్కులు' (ప్లాంట్​ ప్రొటక్షన్​ రైట్స్) పొందింది. అయితే గుజరాత్​కు చెందిన కొంతమంది రైతులు ఇదే రకం బంగాళదుంపను సాగుచేశారు. తమ అనుమతి లేకుండా పండించారని, ఇది మేథో హక్కుల ఉల్లంఘన కిందకు వస్తుందని కారణం చూపి 11మంది రైతులపై పెప్సికో కేసు పెట్టింది. కోట్ల రూపాయల నష్టపరిహారాన్ని డిమాండ్​ చేసింది.

రైతులపై పెప్సికో పెట్టిన కేసులకు వ్యతిరేకంగా దేశవ్యాప్తంగా ఆందోళనలు, నిరసనలు వెల్లువెత్తాయి. ఈ నేపథ్యంలో వెనక్కి తగ్గిన పెప్సికో, ప్రభుత్వంతో చర్చించిన తరువాత కేసులు ఉపసంహరించుకోవాలని నిర్ణయించుకున్నట్లు ప్రకటించింది.

ఇది రైతుల విజయం..

గుజరాత్​ రైతులపై కేసులు వెనక్కి తీసుకోవాలన్న పెప్సికో నిర్ణయాన్ని 'భారతీయ కిసాన్​ సంఘ్​' స్వాగతించింది. ఇది రైతుల ఘన విజయంగా అభివర్ణించింది.

ఇదీ చూడండి: మసూద్​ అంశంపై ఆగని మాటల మంటలు