'పరీక్షా పే చర్చ' కార్యక్రమంలో భాగంగా నేడు విద్యార్థులతో సంభాషించనున్నారు ప్రధానమంత్రి నరేంద్ర మోదీ. బోర్డ్ ఎగ్జామ్స్లో ఒత్తిడిని జయించేందుకు విద్యార్థులకు మోదీ సలహాలు, సూచనలు ఇవ్వనున్నారు.
ఈ మేరకు మూడో విడత పరీక్షా పే చర్చ కార్యక్రమాన్ని దిల్లీలోని తాల్కటోరా ఇండోర్ స్టేడియంలో సోమవారం నిర్వహించేందుకు ఏర్పాట్లు పూర్తి చేశారు అధికారులు. దేశవ్యాప్తంగా పలు విద్యాసంస్థల నుంచి 2,000 మంది విద్యార్థులు, ఉపాధ్యాయులు, వారి తల్లిదండ్రులు ఈ కార్యక్రమానికి హాజరవుతారని వెల్లడించారు. ఉదయం 11 గంటలకు కార్యక్రమం ప్రారంభం కానుంది.
ఈ కార్యక్రమానికి దాదాపు 2.6 లక్షల మంది విద్యార్థులు దరఖాస్తు చేసుకున్నట్లు అధికారులు వెల్లడించారు. వ్యాసరచన పరీక్ష నిర్వహించి ప్రతిభ ఆధారంగా 1,050 మంది విద్యార్థులను ఎంపిక చేసినట్లు చెప్పారు. గతేడాది 1.4 లక్షల మంది దరఖాస్తు చేసుకున్నారు.