మోదీ కాన్వాయ్​, హెలికాప్టర్​ తనిఖీ.. ఐఏఎస్​పై వేటు

ప్రధాని నరేంద్రమోదీ వాహన శ్రేణితో పాటు హెలికాప్టర్​ను తనిఖీ చేసినందుకు ఓ ఐఏఎస్​ అధికారిని సస్పెండ్ చేసింది ఎన్నికల సంఘం. నిబంధనల ప్రకారం ప్రత్యేక రక్షణ దళం(ఎస్​పీజీ) సిబ్బందికి తనిఖీల నుంచి మినహాయింపు ఉందని పేర్కొంది.

నిబంధనలను ఉల్లంఘించారని ఓ ఐఏఎస్ అధికారిపై వేటు వేసింది ఎన్నికల సంఘం. ఒడిశా సంబల్​పుర్​లో ఎన్నికల పరిశీలకుడిగా ఉన్న అధికారి.. ప్రధాని నరేంద్రమోదీ వాహన శ్రేణితో పాటు హెలికాప్టర్​ను తనిఖీ చేశారు.

ప్రత్యేక రక్షణ దళ(ఎస్​పీజీ) సిబ్బందికి తనిఖీల నుంచి మినహాయింపు ఉంది. నిబంధనలు పాటించకుండా తనిఖీలు చేయటం ఉల్లంఘనేనని ఈసీ వ్యాఖ్యానించింది.

సంబల్​పుర్​లో మంగళవారం జరిగిన బహిరంగ సభకు మోదీ హాజరయ్యారు. ఈ సందర్భంగా మోదీ వాహన శ్రేణిని సాధారణ పరిశీలకుడు మహ్మద్​ మోసీన్​ తనిఖీ చేయటంపై ఈసీ చర్యలు తీసుకుంది.

ఈ విషయంపై విచారణకు ఎన్నికల ఉప కమిషనర్​ ధర్మేంద్ర శర్మను సీఈసీ సునీల్ అరోడా నియమించారు. రెండు రోజుల్లోగా నివేదిక ఇవ్వాలని ఆదేశించారు.

2014 ఏప్రిల్​ నాటి నిబంధనల ప్రకారం ప్రధాన మంత్రితో పాటు ఎస్పీజీ సిబ్బందికి తనిఖీల నుంచి మినహాయింపు ఉంది.

ఇదీ చూడండి: సీఎం హెలికాప్టర్​ తనిఖీ చేసిన అధికారులు