2020 జనవరి నుంచి నేషనల్ ఇంటెలిజెన్స్ గ్రిడ్(నాట్గ్రిడ్) అందుబాటులోకి రానుంది. ఈ విషయాన్ని కేంద్ర హోంమంత్రిత్వశాఖ అధికారులు వెల్లడించారు. వలసలు, బ్యాంకింగ్, పన్ను, రైల్వే- విమాన సేవలు తదితర అంశాల సమాచార సేకరణకు ఈ గ్రిడ్ ఉపయోగపడనుంది.
రూ. 3వేల 400 కోట్లతో చేపట్టిన ఈ ప్రాజెక్టుకు సంబంధించిన పురోగతిని కేంద్ర హోంమంత్రి అమిత్ షా ఇటీవలే సమీక్షించారు. ఆ తర్వాత నాట్గ్రిడ్కు సంబంధించిన పనులు మరింత వేగవంతం అయ్యాయి.
ఎందుకు...? ఎలా...?
26/11 ముంబయి ఉగ్రదాడుల అనంతరం ఇలాంటి పటిష్ఠ నిఘా వ్యవస్థ ఏర్పాటుపై సుదీర్ఘ చర్చ జరిగింది. ఎట్టకేలకు కార్యరూపం దాల్చింది. ఈ గ్రిడ్ ద్వారా ముష్కరుల కదలికలను పసిగట్టి.. ఉగ్రదాడులను నియంత్రించవచ్చు.
నాట్గ్రిడ్లో వలసలు, బ్యాంకింగ్, ఆర్థిక లావాదేవీలు, క్రెడిట్ కార్డు వినియోగం, టెలికాం, వ్యక్తిగత పన్ను చెల్లింపుదారులు, విమాన- రైల్వే సర్వీసు సహా ఇతర నిఘా వ్యవస్థకు సంబంధించిన డేటా ఉంటాయి. ఈ ప్రాజెక్ట్ కోసం ఇప్పటికే ఐటీశాఖ నుంచి దాదాపు 8 కోట్ల మంది పన్ను చెల్లింపుదారుల వివరాలను సేకరించింది కేంద్రం. పౌర విమానయానశాఖ, ఇతర విమానయాన సంస్థల నుంచి ప్రయాణికుల సమాచార సేకరణకు కేంద్రం కసరత్తు చేస్తోంది.
తొలిదశలో 10 యూజర్ ఏజెన్సీలు(ఐబీ, సీబీఐ...), 21 సర్వీసు ప్రొవైడర్లు ఈ గ్రిడ్తో అనుసంధానమవుతారు. మరో దశలో 950 సంస్థలు, రానున్న సంవత్సరాల్లో 1000 కంపెనీలు గ్రిడ్లో భాగమవుతాయి.
ఇదీ చూడండి:-క్యాబ్లో కండోమ్లు తప్పనిసరి... లేదంటే జరిమానా!