వేధింపుల​కు చిల్లర గుణ'పాఠం'

మధ్యప్రదేశ్​ దేవాస్​ నగరంలోని జ్ఞానసాగర్ అకాడమీ పాఠశాల ప్రిన్సిపాల్ ఫీజుల కోసం పిల్లలను వేధిస్తోంది. ఫీజు కట్టటం ఆలస్యమైన ఓ పిల్లవాడి తండ్రి వేధింపులపై ఊహించని రీతిలో స్పందించాడు. బ్యాంకు నుంచి ఓ బస్తా చిల్లర తెచ్చి ప్రిన్సిపాల్​ బల్లపై పోసి ఏరుకోమన్నాడు. ఈ సంఘటనతో ప్రిన్సిపాల్​కు నోట మాట రాలేదు.

ప్రైవేటు పాఠశాలల్లో ఫీజుల కోసం పిల్లలను వేధిస్తున్న ఘటనలు సర్వసాధారణం. మధ్యప్రదేశ్​ దేవాస్​ నగరంలోని అధిక ఫీజులు వసూలు చేస్తున్న జ్ఞానసాగర్ అకాడమీ పాఠశాల ఇందుకు మినహాయింపు ఏంకాదు. ఫీజులు చెల్లించని విద్యార్థుల పట్ల అమానుషంగా వ్యవహరిస్తోంది ఆ స్కూల్ పెద్ద పంతులమ్మ. రూ. 1000 ఫీజు చెల్లించాలని ఓ విద్యార్థి పట్ల కఠినంగా వ్యవహరించింది పాఠశాల యాజమాన్యం. బాధ భరించలేకపోయిన ఆ విద్యార్థి తన తండ్రికి చెప్పాడు.

ఆ విద్యార్థి తండ్రి ఓ రైతు. ఆయనది సకాలంలో ఫీజు చెల్లించలేని పరిస్థితి. డబ్బు అందగానే వేధింపుల ప్రిన్సిపాల్​కు బుద్ధి చెప్పాలనుకున్నాడు. అనుకున్నట్లుగానే వినూత్న ఆలోచనతో బుద్ధి చెప్పాడు. బ్యాంకుకు వెళ్లి ఓ బస్తా చిల్లర తీసుకున్నాడు.

నేరుగా ప్రిన్సిపల్​ దగ్గరకు వచ్చి ఆమె బల్లపై చిల్లర గుమ్మరించాడు. ఊహించని ఘటనతో ప్రిన్సిపల్​కు నోట మాట రాలేదు. ఈ ఘటన విద్యాశాఖ ఉన్నతాధికారులకు చేరింది. సదరు ప్రిన్సిపల్​పై చర్యలు తీసుకుంటామని అధికారులు హామీ ఇచ్చారు.

"ఈ ఘటన మా దృష్టికి వచ్చింది. పాఠశాల యాజమాన్యానికి, విద్యార్థి తండ్రికి మధ్య వివాదం తలెత్తింది. ఈ విషయంపై విచారణ చేపట్టాం. సదరు ప్రిన్సిపాల్ తప్పు చేసినట్లు తేలితే తగిన చర్యలు తీసుకుంటాం."-విద్యాశాఖ ఉన్నతాధికారి