పాల కేంద్రాల్లో స్పెషల్​ చికెన్​ అమ్మకం- కిలో రూ.900

మధ్యప్రదేశ్  ప్రభుత్వం ఓ కొత్త కార్యక్రమానికి శ్రీకారం చుట్టింది. రాష్ట్రంలో తప్ప మరెక్కడా పెరగని కడక్​నాథ్​ కోడి మాంసాన్ని, గుడ్లను పాలకేంద్రాల్లో అమ్మేందుకు సిద్ధమవుతోంది. ప్రయోగాత్మకంగా భోపాల్​లో ఓ కేంద్రాన్ని నేడు ప్రారంభించింది. అయితే ఈ నిర్ణయంపై భాజపా తీవ్ర వ్యతిరేకత వ్యక్తం చేస్తోంది.

పాల కేంద్రాల్లో కడక్​నాథ్​ కోడి మాంసం, గుడ్లు అమ్మేలా నిర్ణయం తీసుకుంది మధ్యప్రదేశ్​లోని​ కమల్​నాథ్​ సర్కార్. రాష్ట్ర పశు, పౌల్ట్రీ కోఆపరేషన్​ ఆధ్వర్యంలో నడిచే భోపాల్​లోని ఓ​ పాలకేంద్రంలో పైలట్​ ప్రాజెక్ట్​ను ప్రారంభించింది. పబ్లిక్​ ప్రైవేట్​ భాగస్వామ్యంలో ఈ కేంద్రాలను నడపాలనే యోచనలో ప్రభుత్వం ఉంది. ప్రస్తుతం కడక్​నాథ్​ చికెన్​ ధర మార్కెట్లో కిలో రూ.900గా ఉంది.

ఈ కోడి మాంసంలో ఆరోగ్యకరమైన అత్యధిక పోషక విలువలు ఉండటం వల్ల బాగా డిమాండ్​ ఉంది.

"కడక్​నాథ్​ కోడి మాంసాన్ని విక్రయించేందుకు ప్రయోగాత్మకంగా భోపాల్​లో ఓ కేంద్రాన్ని ఏర్పాటు చేశాం. రాష్ట్రవ్యాప్తంగా ఇలాంటి కేంద్రాలను ఏర్పాటు చేయాలని చర్చిస్తున్నాం. ఈ పైలట్​ ప్రాజెక్ట్​ విజయవంతమైన ఈ కేంద్రాలను ఇంకా విస్తరిస్తాం."
- లఖన్​ సింగ్, రాష్ట్ర పశు సంవర్థక మంత్రి

భాజపా ఆగ్రహం...

ఈ నిర్ణయంపై భాజపా అభ్యంతరం వ్యక్తం చేసింది.

"ఆవు పాలు, కడక్​నాథ్​ మాంసం ఒకే కేంద్రంలో అమ్మడానికి వీల్లేదు. ఇది మత విశ్వాసాలను దెబ్బతీసినట్లే. ఆవు పాలను స్వచ్ఛంగా భావించి.. పూజాధికాలకు వినియోగిస్తారు. ఉపవాస దీక్షలకు వాడతారు. రెండింటికీ వేర్వేరు పార్లర్లు ఏర్పాటు చేయాలని ప్రభుత్వాన్ని కోరుతున్నాం."
- రమేశ్​ శర్మ, భాజపా ఎమ్మెల్యే

భాజపా విమర్శలను ప్రభుత్వం తోసిపుచ్చింది. కేంద్రం ఒక్కటే ఉన్నప్పటికీ పాలు, మాంసం నిల్వ, విక్రయాలకు వేర్వేరు కేబిన్​లు ఉంటాయని స్పష్టం చేసింది.

2018 ఆగస్టులో కడక్​నాథ్​ మాంసంపై మధ్యప్రదేశ్​ జబువా జిల్లా భౌగౌళిక సూచిక (జీఐ) ట్యాగ్​ సాధించింది. ఇక్కడ నుంచే ఈ మాంసం సరఫరా అవుతుంది. ఛత్తీస్​గఢ్​, మధ్యప్రదేశ్​ రాష్ట్రాల మధ్య కడక్​నాథ్​ కోళ్ల మూలాల హక్కులపై ఎన్నో ఏళ్లు పోరాటం నడిచింది.

• ఇదీ చూడండి: కాసులు కురిపించే కడక్​నాథ్​ కోళ్లు