వచ్చే వర్షాకాలం గడ్డుకాలమే: స్కైమెట్​

దేశవ్యాప్తంగా ఈ ఏడాది లోటు వర్షపాతం నమోదయ్యే అవకాశాలున్నాయని ప్రముఖ వాతావరణ సంస్థ స్కైమెట్​ తెలిపింది. ఇందుకు 'ఎల్నినో' ప్రభావమే ప్రధాన కారణమని స్కైమెట్​ సీఈఓ జతిన్​ సింగ్​ ప్రకటించారు.

ఈ ఏడాది ఆశించిన స్థాయిలో వర్షాలు పడే అవకాశం లేదని స్కైమెట్​ వాతావరణ సంస్థ ప్రకటించింది. దేశవ్యాప్తంగా లోటు వర్షపాతం నమోదయ్యేందుకు 55 శాతం అవకాశాలున్నాయని తెలిపింది.

'ఎల్నినో'(భూమధ్యరేఖకు సమీపంలో పసిఫిక్​ మహాసముద్రం ఉష్ణోగ్రతలు ఎక్కువ కాలం సాధారణ స్థితికి మించి ఉండటం) ప్రభావమే ఇందుకు ప్రధాన కారణమని స్కైమెట్ సీఈఓ జతిన్​ సింగ్ వివరించారు. 1951 నుంచి 2000 సంవత్సరం వరకు సాధారణ వర్షపాతం 89 సెంటీమీటర్లుగా నమోదైంది. అయితే ఈ ఏడాది అంతకంటే తక్కువ వర్షమే కురవనుందని జతిన్​ తెలిపారు.

2019లో దీర్ఘకాలిక సగటు వర్షపాతంలో(ఎల్​పీఏ) 93 శాతమే నమోదు కానుంది. ఎల్​పీఏలో 90-95 శాతం మధ్యలో వర్షపాతం కురవటమంటే అది లోటు వర్షపాతం పరిధిలోకే వస్తుందని స్కైమెట్ ప్రకటించింది.